Ajet Potera: Ju vidhni, mashtroni e keqpërdorni – nga ne kërkoni të heshtim

Ish-komandanti i Ushtrisë Çlirimtare të Kosovës, Ajet Potera, përmes një statusi në rrjetet sociale ka reaguar ashpër ndaj abuzimeve dhe keqpërdorimeve të pushtetit, duke deklaruar se nuk do të bëhet pjesë e heshtjes dhe politikës ditore për interesa personale.

“Në këtë shtet ku kam hise me djersë e gjak, ku kam varrosur me duart e mia të rinj që ua kam mësuar pushkën, unë nuk do të hesht kurrë. Nuk jam nga ata që rrinë të strukur dhe bëjnë sehir. Deri më sot, askujt që ka qenë në rrugën e gabuar nuk i kam thënë ‘puna e mbarë’,” ka shkruar Potera.

Ai theksoi se përgjatë gjysmë shekulli të jetës së tij ka dëshmuar se nuk është prej atyre që heshtin përballë padrejtësive dhe se gjithmonë ka dalë në dritën e diellit kur ka kërkuar rasti.

Duke cituar Mahatma Gandhin, Potera shtoi: “E vërteta asnjëherë nuk e dëmton kauzën e drejtë. Prandaj, e vërteta ime është kjo: unë nuk do të hesht kurrë.”

Në fund të reagimit të tij, ai u bëri thirrje qytetarëve që të mos u japin mundësi vendimmarrjeje atyre që nuk e meritojnë:

“Qytetarë të nderuar, askujt që nuk e meriton të mos i japim shans katër vite vendimmarrje, por as katër muaj, janë tepër shumë!” – përfundoi Potera.