Agim Veliu tregon se a do të bëhet LDK-ja pjesë e dialogut!

Lidhja Demokratike e Kosovës me këmbëngulje vazhdon të mbajë qëndrim të prerë karshi dialogut Kosovë – Serbi, duke refuzuar të bëhet pjesë e këtij procesi negociues.

Nënkryetari i LDK-së Agim Veliu, tha për “Gazeta Blic” se nuk do të bëhen patericë e koalicionit qeverisës PDK-AAK-NISMA dhe AKR për ta përmbyllur dialogun me Serbinë.

“Ne asnjëherë nuk jemi bërë patericë e askujt dhe nuk do të bëhemi. Qëndrimi i LDK-së për dialogun nuk ka ndryshuar, pra LDK vazhdon të mbajë qëndrim të njëjtë. Ne po i përcjellim zhvillimet rreth kësaj çështje dhe në momentin që konsiderojmë se duhet të ndryshojmë qëndrim për interes të qytetarëve dhe të LDK-së, do të thërrasim mbledhjen e kryesisë dhe do të vendosim”, tha Veli.

Ndërkaq i pyetur rreth deklaratave të bashkëpartiakut të tij Lutfi Hazirit, se dialogu me Serbinë nuk do të përfundojë pa përfshirjen e LDK-së, Veliu refuzoj t’i komentoj ato duke thënë se atë e ka kolegë, por ka ritheksuar se qëndrimet e partisë nuk kanë ndryshuar. “Qëndrimet tona janë publike, ju ato i dini dhe nuk kanë ndryshuar asgjë”, u shpreh ai.

Në vitin që e lëm pas, kreu i LDK-së Isa Mustafa, tha se do ta përkrahë dialogun ndërmjet Kosovës dhe Serbisë, pa u përfshirë në ekipin negociator.

Mustafa, tha se kjo parti nuk do të bëhet pjesë e grupeve “informale” të cilat janë themeluar se fundmi nga ana e Kuvendit, por do të kontribojë me diskutime, si dhe do të vlerësojë në fund, nëse do të pranojë ose jo, ta votojë marrëveshjen e mundshme midis Kosovës dhe Serbisë.

“Çdo marrëveshje do të arrijë në Kuvend, dhe çdo marrëveshje nuk kalon me 59 vota, por kërkohen 80 vota, pra shumicë meritore për të miratuar një marrëveshje ndërkombëtare. LDK-ja do ta jap kontributin duke dhënë mendimin e vet nëse do ta ratifikojë ose jo këtë marrëveshje. Nëse do të kemi transparencë në dialog ne do të kyqemi, por nuk do të bëhemi pjesë në grupe të cilat për ne janë informale” tha Mustafa.

Ndryshe, Kuvendi i Kosovës ka arritur ta krijojë një ekip negociator, i përbërë nga përfaqësuesit e partive politike në pushtet, si dhe nga subjekti opozitar, Partia Socialdemokrate. Dy partitë tjera më të mëdha në opozitë, Lidhja Demokratike e Kosovës dhe Lëvizja Vetëvendosje, kanë refuzuar të jenë pjesë e këtij ekipi.

Ekipi negociator së bashku me presidentin e Kosovës, Hashim Thaçi, pritet të shkojë në një takim në Bruksel, më 8 janar të vitit 2019./