Agim Veliu mesazh ngushëllimi për vdekjen e Agim Kikajt

Agim Veliu i ka shprehur ngushëllimet e tij të sinqerta për vdekjen e ish-deputetit të LDK-së nga Podujeva, Agim Kikajt, i cili ndërroi jetë mbrëmë vonë.

Veliu në një postim në rrjetin social Facebook ka shkruar se vdekja e Agimit është humbje e pakompensuehsme i cili rrezatonte gjithmonë vetëm dashuri dhe afërsi për të gjithë.

Sipas tij, Agim Kikaj që ishte edhe kryetar i komunës së Podujevës vite më parë, gjithmonë i thoshte fjalët e duhura në momentin e duhur.

Ja ngushëllimi i kryetarit Veliu:

E dashur Familje Kikaj,

Të nderuar qytetarë të Podujevës,

Të respektuar anëtarë të Lidhjes Demokratike të Kosovës,

Jam thellësisht i tronditur me shkuarjen e parakohshme në amshim të Agim Kikajt, mikut e bashkudhëtarit tim, deputetit të Kuvendit të Kosovës, ish Kryetarit i Komunës, anëtarit të Kryesisë së Degës së LDK-së në Podujevë.

Kikaj, ishte kultivues i idealeve të larta kombëtare. I dashuruari i shqipes. Penda ia kishte zili për fjalët e bukura që shkruante. Burrë i Kosovës. Vullnetçelik në angazhim për ndërtimin e Kosovës. Zemërplasur, nuk gjeti rehati dhe nuk u pajtua asnjëherë me realitetin e ndrydhur që e rrethoi vendin tonë. Njeriu i zgjidhjes; vërtetë jepte zgjidhje të problemeve në diskutimet e tij. Guximtar. Gjithmonë i tha fjalët në vendin e duhur, me tonin e duhur.

Është humbje e pakompensueshme shuarja e njeriut që kishte kohë për të gjithë, rrezatonte dashuri e afërsi për të gjithë ne.

Ngushëllimet më të sinqerta, Familjes Kikaj, qytetarëve të Kosovës, anëtarëve të LDK-së, për të cilët punoi e veproi që nga kohët më të vështira, deri në shkuarjen e tij në amshim!

Fjalët nuk e përshkruajnë dot ndjenjën e dhembjes për ty!

U prehsh në paqe, miku im Agim!