Agim Veliu: LDK nuk do ta përkrahë protestën e VV-së kundër Presidentit Thaçi, nuk është koha

Nënkryetari i Lidhjes Demokratike të Kosovës, Agim Veliu pas mbledhjes së partisë është prononcuar për media, shkruan Gazeta Blic.

Veliu ka thënë se LDK nuk i është përgjigjur ftesës së VV për protestë për shkak se tani nuk është koha.

Nënkryetari është shprehur i bindur që protesta është opsioni i fundit, duke mos e përjashtuar kështu që një ditë vet LDK të kërkojë protestë.

Sipas tij përpara kësaj proteste LDK ka për të ndërmarrë edhe disa veprime të tjera, duke folur për mocionin ndaj Qeverisë Haradinaj.

“LDK nuk është kundër shprehjes së vullnetit qytetarë qoftë edhe nëpërmjet protestave,mirëpo, ne si kryesi nuk e kemi vlerësuar se është momenti për protestë që të thërrasim protesta, për arsye se mendojmë që na kanë mbetur edhe 2-3 veprime për ti bërë të cilat janë të rëndësishme dhe pastaj për ne vjen në pyetje hapi i fundit i cili është protesta të cilën nuk e përjashtojmë, por, nuk do ti përgjigjemi ftesës së Vetëvendosjes sepse ne kur e vendosim për protestë do ta organizojmë vetë si LDK”, ka deklaruar Veliu shkruan Gazeta Blic.

Veliu ka thënë se LDK fillimisht do të ngrisë mocionin pastaj do ta vendos se a do të dalë apo jo në protesë.

 

 

Ai më tej është shprehur i bindur që LDK kur të ngrisë mocionin do të ketë përkrahje edhe nga deputetët e pozitës.

“Pas mocionit nëse nuk do të ketë sukses, atëherë ne do ta diskutojmë edhe mundësinë e protestës”, tha ai.