Afrim Muçiqi mohon se zyrtari i AAK’së e kishte kërcënuar me fajde e haraq

Dalip Brahimi kishte qenë në mesin e pesë të arrestuarve që më 21 dhjetor 2018 iu caktua masa e paraburgimit nën dyshimet për krim të organizuar, detyrim dhe fajde – raporton Periskopi.

Brahimi, më 21 dhjetor kur edhe ishte arrestuar, në media ishte prezantuar si zyrtar i AAK’së në nëndegën e kësaj partie në Kodrën e Trimave.

Në një mesazh anonim dërguar Periskopit, një nga lexuesit ka thënë se Brahimi akuzohet për haraq dhe fajde kundër këngëtarit Afrim Muçiqi, dhe shumë personave të tjerë që e kanë lajmëruar.

Sipas tij, madje i tërë rasti në Polici ishte lajmëruar nga këngëtari Muçiqi, për shantazh, kërcënim dhe maltretim.

Por, këtë gjë kategorikisht e ka mohuar këngëtari Muçiqi.

I telefonuar nga Periskopi, ai ka thënë se nuk ka dëgjuar ndonjëherë për emrin e këtij personi dhe se nuk janë të vërteta raportimet se ai i ka qitur haraq apo fajde.

Tutje, me arrogancë ai ka thënë përmes telefonit që mos ta shqetësojmë më për këtë çështje.

“O gabim jeni t’u më thirr se s’është e vërtet që me ka qit haraq. Unë as nuk e njoh atë njeri. Për herë të parë prej medieve ia nijta emrin. Më keni lodh. Mos me shqetësoni më”, i ka thënë Muçiqi gazetares së Periskopit dhe i ka ndalur telefonin, duke ia pamundësuar që të bëjë pyetje të tjera lidhur me rastin.

Pas arrestimit të Brahimit i cili në media u prezantua si zyrtar i AAK’së, pati reagoi nga kjo parti.

Ata përgënjeshtruan lajmin se i arrestuari Dalip Brahimi kishte qenë ndonjëherë pjesë e strukturave drejtuese në çfarëdo niveli.

Por, që është zyrtar i kësaj partie nuk e mohuan.

Më 21 dhjetor, Gjykata kishte vendosur që pesë të arrestuarit, të dyshuar për krim të organizuar, detyrim dhe fajde, të mbaheshin në paraburgim, pasi frikësoheshin se do të arratiseshin.

“Gjykata ka konstatuar se lënia e tyre në liri do te rrezikonte arratisjen e tyre. Dhe rreziku se të njëjtit mund ta kryejnë veprën penale”, thuhet në vendimin e Gjykatës.

Ishte raportuar se në mesin e të arrestuarve të këtij grupi kishte qenë edhe kryetari i Grupit të Tifozëve “Dardanët”, Lulzim Berisha.

I dyshuar për fajde dhe krim të organizuar kishte qenë edhe djali i ish-komandantit të UÇK’së, Sabit Geci, shtëpia e të cilit ishte bastisur nga Njësia Speciale e Policisë së Kosovës.

Ky nuk ka qenë rasti i parë që biznesmeni i dyshimtë Dalip Brahimi ka telashe me ligjin.

Ai ka qenë i akuzuar në një rast për pastrim parash me toka në Çagllavicë, përfshirë Mehmet Prishtinën, shoferin e Azem Sylës, Arton Vilën dhe biznesmenë të lidhur me PDK-në, siç është Bejtush Zhugolli. Mes të akuzuarve ishte edhe djali i ish-kryetarit të Vushtrrisë, Bajram Mulaku, Albioni. Përfshirja në këtë rast ka nxitur dyshime të më mëdha për prejardhjen e parave të tij.

Përpos dyshimeve për kryerjen e veprave penale, biznesmeni Dalip Brahimi ka sfiduar vetën edhe në politik. Nuk ka arritur suksese të mëdha si në biznesin ilegal të fajdeve. Ka mbetur vetëm politikan lokal. Ka arritur të bëhet kryetar i degës së AAK-së, në Kodrën e Trimave./PERISKOPI