Abazi tregon se si mund ta formojë PAN qeverinë!

Njohësi i çështjeve politike, Haki Abazi në një prononcim për “Gazeta Blic”, tha se PAN ka gjasë që të formojë qeverinë pasi që mandati i deputeti nuk është i lidhur me partinë.

Sipas Abazit, Haradinaj gjendet në një situatë të vështirë siç thotë ai mes “Kullës e Çekanit”.

“Nuk është e pamundur që PAN të sigurojë numrat për të formuar qeverinë. Në sistemet demokratike reprezentative kjo gjë është krejt e mundur meqë megjithatë mandati i deputetit është mandat i lidhur për individin dhe jo partinë. Tani kjo do të siguronte numrin e nevojshëm për të krijuar qeverinë dhe unë e mendoj që personalisht Z. Haradinaj është venë në një situate shumë të vështirë apo siç them ndërmjet “Kullës dhe Çekanit” është shumë vështire të shihet një skenar ideal nga këto rezultate”, ka thënë ai.

Ai më tej ka thënë se tani më është koha që edhe partitë politike të reflektojnë për shkak se kanë krijuar një hendek të madh, dhe se këto parti kanë përgjegjësi para votuesit të tyre madje edhe të atyre që nuk kanë votuar.

“Megjithatë është koha për të reflektuar për të gjitha partitë sepse kështu siç janë po ju del afati dhe kanë krijuar një hendek të madh. Llogaritni numrin e atyre që kanë dalur në zgjedhje kundrejt atyre që nuk kanë dalur përderisa institucionet duhet të jenë në shërbime të të gjithëve përfshirë edhe ata që nuk kanë votuar fare”, ka thënë Abazi për Gazeta Blic.

Abazi ka numëruar disa aryse përse ai beson që nuk do të ketë parlament para shatorit.

“Nuk e besoj që do të ketë parlament para shtatorit dhe janë tre arsyeje besoj: Marrëveshjet nuk mund të finalizohen shumë shpejtë me ata deputet apo parti që duhet të jenë në qeveri, Gjykata Speciale do të krijoj një tërmet në Kosovë në rast të veprimit dhe kjo ka anën negative të mundësisë së zhagitjes së proceseve dhe pasojat që mund të vijnë nga reagimi dhe propaganda e shteti serb dhe në anën tjetër gjykata do të “lirojë” kushtimisht disa pozita të rëndësishme me të cilat ka mundësi që është duke u bërë pazar qysh tani dhe e treta, shumica e parlamentareve dhe njerëzve tjerë me ndikim në qarqet politike e kanë pushimin veror si justifikim”, tha ai.

Në anën tjetër Koalicioni PAN është i bindur se formimi i Kuvendit do të ndodhë para datës 8 gusht. Madje ata insistojnë se kjo do të ndodhë në pjesën e parë të afatit ligjor për formimin e legjislativit.

Ndërsa koalicioni LAA dhe LVV kanë përjashtuar çdo mundësi të bashkëpunimit me PDK-në. Madje pritet një koalicion i mundshëm i LAA-së me LVV-në për formimin e qeverisë pasi këta të fundit janë të bindur që koalicioni PAN nuk i ka numrat për formimin e Qeverisë së Kosovës./GazetaBlic.com/