AAK kërkon zgjedhje në afatin sa më të shpejtë

Shefi i Grupit Parlamentar të Aleancës për Ardhmërinë e Kosovës, Pal Lekaj është shprehur se zgjedhjet e përgjithshme në vend duhet të mbahen në afatin sa më të shpejtë. 

Sipas tij, organizimi i tyre nuk duhet të varet nga disponimi partive në pushtet por nga gjendja reale në të cilën ndodhemi si shtet e shoqëri.

“Nëse bazohemi në këta muajit e fundit, jemi në bllokadë totale dhe pa rrugëdalje tjetër përveç zgjedhjeve të cilat do të mund të legjitimonin një qeveri kredibile e cila do t’i bënte ballë presionit serb dhe nuk do të bënte koncesione të tilla çfarë po ka tendencë t’i bëjë sot qeveria”, ka thënë Lekaj për Indeksonline.

Lekaj duke komentuar mundësinë e ndonjë koalicioni partiak, ka shtuar se si po qeveriset Kosova e si po menaxhohet Kuvendi, nuk janë modele që AAK i mbështetë dhe që përshtaten me atë çka pretendon AAK, për të arritur Kosova.

“Mëkatarët duhet dënuar, e qytetarët janë ata me të cilët kemi koalicion të sigurt para dhe pas zgjedhjeve, bashkë me ta ne do t’ia arrijmë që këta mëkatarë që sot qeverisin t’i dërgojmë në shtëpi. Me NISMA-n, si subjekt politik e kemi të formalizuar po ashtu të tjerat janë spekulime të llojit të vetë. Pse ka spekulime të tilla është e kuptueshme, sepse këto subjekte që sot janë në qeverisje, rrezikun e vetëm e shohin nga Aleanca për Ardhmërinë e Kosovës dhe prandaj me spekulime të tilla tentojnë t’ia humbin kuptimin fitores së AAK-së. Por kjo nuk do të ndodhë edhe përkundër goditjeve që po ndodhin ndaj partisë e liderit të saj”, ka shtuar Lekaj.

Gjithashtu deputeti Lekaj ka ripërsëritur se organizimi i zgjedhjeve nuk duhet të ketë për bazë disponimin e askujt nga subjektet politike, ato duhet të mbahen sa më parë, sepse vendi në të gjitha dimensionet është bllokuar dhe se nuk ka perspektivë për qytetarët./Indeksonline/