A u dorëzua Agim Veliu, pasi që “miqtë” e lanë të vetmuar

Ish-kreu i Komunës së Podujevës, deputeti Agim Veliu, përmes një shkrimi në ‘facebook’ ka njoftuar se dega e LDK-së në Podujevë bashkë me kreun e partisë, Lumir Abdhixhiku, kanë thirrë mbrëmë një Kuvend të jashtëzakonshëm të degës së Podujevës.

Ai ka thënë se një kuvend i tillë është kundër statutit të LDK’së dhe i paligjshëm, prandaj potencon se nuk do të marrë pjesë.

Por në fakt a po tregohet i pafuqishëm tani Agim Veliu përballë strukturave të degës të cilët e organizuan këtë Kuvend dhe atë pa dijenin e tij. Sipas burimeve tona Agim Veliu ka mbetur thuajse i vetëm pasi që edhe ata që ai i ka llogaritur pjesë të ekipit të tij e kanë lënë vetëm.

Me gjasë sot edhe do të jetë ajo goditja fatale për Agim Veliun për të ardhmen e tij politike sa i përket degës dhe pozicioneve që ai kishte në LDK-në e Podujevës.

Ky është postimi i tij pak para fillimit të Kuvendit:

Të dashur veprimtarë, anëtarë dhe simpatizantë të Lidhjes Demokratike të Kosovës,

Ata që vitin e kaluar i dhanë goditjen e parë degës së LDK-së në Podujevë, duke e zhveshur nga kompetenca kryetarin dhe kryesinë e degës, po vazhdojnë misionin e tyre të shkatërrimit të degës.

Të njëjtit, në krye me kryetarin e partisë Lumir Abdixhiku, sërish duke shkelur mbi statutin e LDK-së, qenkan mobilizuar gjatë natës dhe në mënyrë klandestine paskan thirrur një Kuvend të jashtëzakonshëm të degës në Podujevë.

Duke qenë se kuvendi i sotëm është kundërstatutar dhe i paligjshëm, të dashur veprimtarë dhe anëtarë të LDK-së, ju njoftoj se nuk do të marr pjesë në një farsë të tillë, ku do të tentohet të kontrabandohet një kryetar i ri, që nuk është as pjesë e strukturave të degës sonë.

Kjo që po bën Abdixhiku, me misionarët anti LDK të mbledhur rreth vetes, nuk është asgjë tjetër veçse një proces i shkatërrimit të degës në Podujevë, bastionit të fundit të LDK-së.