A pritet ta shkarkoj Bulliqi edhe drejtorin e Kulturës në Podujevë? – Pajtim Balaj flet për media

Kryetari i komunës së Podujevës, Shpejtim Bulliqi, shkarkoi nga detyra drejtorin e Inspeksionit, Besnik Mulliqi, të martën e 2 gushtit. Shkarkimi i tij erdhi pikërisht pas rrëzimit të dy objekteve në Orllan të Podujevës.

Një ditë pas, në media u përfol se priten edhe shkarkime të tjera në kuadrin e drejtorëve nga kryetari Bulliq. Në këtë listë u lakua edhe emri i drejtorit të Kulturës, Rinisë dhe Sportit, Pajtim Balajt.

Por, lajmin për një shkarkim apo dorëheqje të mundshme nga pozita e drejtorit e mohoi Balaj në një prononcimi për Gazetën Insajderi.

Duke i quajtur fake news raportimet, Balaj i tha Insajderit se nuk e ka në plan dorëheqjen dhe se nuk rrezikon shkarkimin nga pozita që ka.

Balaj shtoi se raportet e tij me kryetarin Bulliq vazhdojnë të jenë në rregull.

“Të gjitha lajmet që janë raportuar në media janë fake news. Asgjë nuk ka të vërtetë, nuk do të jap dorëheqje dhe nuk rrezikoj shkarkimin. Raportet e mija me kryetarin janë të mira, punët jemi tu i krye”, tha Balaj për Insajderin.

Ujërat brenda Vetëvendosje janë trazuar pas shkarkimit nga pozita e drejtorit të Inspektorit, Besnik Mulliqi, njëherit edhe sekretarin e VV-së, dega në Llap dhe dorëheqjes së drejtorit të Shëndetësisë Besnik Veliut./GazetaInsajderi/