A po përçahet LDK në mungesë të Isa Mustafës?!

Po bëhen dy muaj që kryetari i Lidhjes Demokratike të Kosovës, Isa Mustafa nuk është fizikisht në Kosovë, e gjithë kjo për shkak të gjendjes së tij jo të mirë shëndetësore, shkruan Gazeta Blic.

Fillimisht, LDK përmes një komunikate për media ka njoftuar se kryetari i LDK-së, është prekur nga një grip sezonal dhe që është duke u trajtuar në institucionet shëndetësore. Por më pas Mustafa  është dërguar në Gjermani për shkak të komplikimeve që ai ka pasur.

Për shkak të mungesës së tij në Kosovë, mediat kanë raportuar për thyerje në LDK.

Por nga kjo parti thonë se LDK është shumë stabile.

Deputetja Besa Gaxherri tha për “Gazeta Blic”, se nuk ka asnjë përplasje në LDK, derisa tregoi se  kush po e zëvendëson liderin e kësaj partie, përderisa ai mungon fizikisht.

“Përplasjet janë të pabaza, të pavërteta, LDK i ka nënkryetaret të gjithë janë aktiv sa herë që ne si grup parlamentar kemi nevojë, po ashtu edhe grupi parlamentar e kanë shefin dhe zëvendësshefin, për momentin gjithçka po funksionon shumë mirë. Me përjashtim të mungesës së liderit Isa Mustafa, i urojmë shëndet dhe të kthehet sa më shpejtë”, është shprehur deputetja Besa Gaxherri.

Gaxherri sqaroi edhe një herë se deputetët e Lidhjes Demokratike të Kosovës nuk janë solidarizuar me deputetët e Vetëvendosjes që ta bojkotojnë seancën ditë më parë, për shkak se kryetari i Kuvendit Kadri Veseli ia ka ndalur mikrofonin gjatë kohës kur ishte duke folur deputetit të VV-së Frashër Krasniqi.

Mirëpo ajo shtoi se për gjërat tjera LDK do ta mbështet VV-në dhe anasjelltas.

‘Ka disa çështje që ne i mbështetim deputetët e VV-së, njëjtë sikur ata neve, por për atë ditë në seancë nuk është e vërtetë, ne kemi qëndruar aty”, ka pohuar Gaxherri.

Ndërkohë, këshilltari i Isa Mustafës, Bajram Gecaj tha sot për “Gazeta Blic” se gjendja shëndetësore e Mustafës është vazhdimisht në përmirësime, dhe që presin që të kthehet sa më shpejt në Kosovë.

“Gjendja e Isa Mustafës është vazhdimisht në përmirësime, presim të na kthehet sa më shpejtë shëndosh e mirë, edhe pse për momentin e kthimit të tij vendosin mjekët”, ka deklaruar Gecaj.

Kthimi i Isa Mustafës në Kosovës, është paralajmëruar të ndodhë në fillimin e kësaj pranvere.

Kështu ka konfirmuar për media ditë më parë, mjeku personal  i tij personal Halil Krasniqi. I cili edhe ka deklaruar se e Mustafa edhe për disa ditë do të qëndrojë në Gjermani për t’i kryer terapitë fizikale, dhe më pas do të kthehet në Kosovë./Gazeta Blic./