A do t’i ndëshkojë LDK-ja “rebelët” e legjislaturës së fundit?

Kush nuk e voton Demarkacionin, nuk ka vend në LDK, kishte thënë shefi i kësaj partie Isa Mustafa.

E kjo deklaratë i ishte drejtuar veçanërisht deputetit të legjislaturës së fundit të LDK-së, që u shpërbë dje, Shpejtim Bulliqi.

Por në këtë listë nuk është vetëm Bulliqi, por edhe Adem Salihaj e Fatmir Rexhepi.

Bulliqi, ishte pothuajse më i zëshmi kundër demarkacionit, e që i ka shkaktuar jo pak telashe kryeministrit në shkuarje, Isa Mustafa.

Qeveria angazhoi dy palë ekspert që ta verifikonin punën e komisionit për Shenjimin e vijës kufitare me Malin e Zi, po sa prezantonin të gjeturat, Bulliqi dilte dhe konstatonte punën e tyre, duke thënë se kufiri është gabim, shkruan lajmi.net.

Nuk ishte vetëm Bulliqi që po u shkaktonte probleme LDK-së.

Të njëjtin qëndrim e kishte edhe deputeti tjetër, Adem Salihaj. Salihaj para se të bëhej deputet në legjislaturën fundit ishte drejtor i stacioni të autobusëve në Ferizaj, ndërsa kishte humbur zgjedhjet për të parin e Ferizajt.

Zyrtarisht ishin këta dy deputetë që kishin dal kundër versionit të komisionit për shënjimin e vijës kufitare me Malin e Zi.

Një zyrtar i LDK-së ka thënë për lajmi.net se Bulliqi e as Salihaj nuk do të jenë në listën e deputetëve që do të garojë me ta kjo parti.

Ky zyrtar që nuk ka dashur t’i përmendej emri, ka thënë se Kryesia e LDK-së do të marr që të mos e fut në listën e deputetëve Bulliqin e Salihajn.

Lajmi.net ka provuar të flas me Shpejtim Bulliqin, Adem Salihajn e Fatmir Rexhepin, por kanë qenë të paqasshëm.

Kur Mustafa kishte thënë se “ai që nuk e voton demarkacionin nuk ka vend në LDK”, kishte reaguar ashpër deputeti Fatmir Rexhepi.

Ai kishte thënë se askush nuk mund ta përjashtojë askënd nga LDK-ja.

Rexhepi kishte thënë se askush nuk mund ta largojë atë nga partia, e as Isa Mustafa. Madje, sipas tij, Mustafa nuk ka kreditë të flas për këtë çështje.

“Unë qe 27 vjet jam në LDK, kam 27 vjet që fitoj besimin e elektoratit. Unë kundërshtoj fuqishëm çdo deklaratë, pavarësisht a është e partisë apo e kujtdo qoftë. S’ka nevojë me na qu selam përmes askujt. Secili duhet të shoh gabimet e veta, edhe ku janë premtimet që i kanë dhënë ne 2014, ku janë tash, secili duhet të jap llogari dhe askush s’mund të më largojë, pasi që jam që 27 vjet aty”, kishte thënë Rexhepi. /Lajmi.net/