Peci dorëzohet para presionit publik: Anulon grantet për këshilltarin e tij dhe
PDK-LDK me fushatë parazgjedhore, Veseli me turin e dëgjimit e Mustafa me ministra në terren
Javë më parë ka nisur turin e dëgjimit nëpër komunat e Kosovës, por i pari i PDK-së, ka mohuar që kjo të jetë fushatë për zgjedhje. Ndryshe nga kryeparlamentari Kadri Veseli, vlerësojnë analistët politikë, Dardan Gashi e Mazllum Baraliu.
Në një prononcim për “Indeksonline”, Gashi ka thënë se sivjet do të ketë zgjedhje, për të cilat tashmë Veseli ka nisur të përgatitet me turin e tij të dëgjimit. Njëjtë, sipas tij, është duke vepruar edhe LDK-ja.
“Sivjet do të kemi patjetër zgjedhje, kjo është natyrisht fushatë. Është pjesë e mobilizimit të partisë së vet, të strukturave të veta. Ai mundet t`ia lë emrin si të dojë, por kjo është fushatë. Personalisht nuk besoj se do t`i prishin marrëdhëniet me LDK-në, por mendoj që secili për vete janë duke u bë gati për zgjedhje, mendoj që për lokale e jo për të tjerat. E kanë më shumë lojë”, është shprehur ai.
Sipas Gashit, LDK-ja ka nisur përmes ministrave të vet fushatën për zgjedhje të parakohshme, duke përdorur paratë e taksapaguesve.
“Edhe ministrat e LDK-së po i dhënë komunave të veta projekte për rrugë e për salla, çdo javë e keni nga një ministër të LDK-së duke dhënë dhurata nëpër komuna, ata vetëm po e bënë pak më mençur, në kuptim të projekteve. LDK-ja po e bën me pare të taksapaguesve, e PDK-ja po bën filma nëpër komuna, por realisht dy palët janë në fushatë”, është shprehur tutje ai.
Në të njëjtin mendim qëndron analisti Baraliu, sipas të cilit jo vetëm PDK-ja e Kadri Veselit, por të gjitha partitë i kanë shtuar aktivitetet e tyre me qytetarët, përfshirë LDK-në.
“Ajo është parafushatë e fushatës dhe në bazë të gjithë parametrave vlerësues që bëhen lidhur me zgjedhjet, nuk është vetëm ai por janë edhe liderët tjerë të partive që gjithsesi këto kohët e fundit, i kanë shtuar aktivitetet e tyre në teren. Edhe vet LDK-ja kudo po e shfrytëzon rastin, nëpër vizitat në terren, janë një modalitet tjetër e kontaktimit me bazën, por është një model më intensiv i kontaktimit që i vjen gjithsesi era paraelektorale. Të themi është një atmosferë e një gjendje paraelektorale e cila gjithsesi do të duhej të reflektojë”, ka thënë Baraliu për “Indeksonline”.
Ai ka shtuar se “duhet të ketë zgjedhje të parakohshme, sepse janë e vetmja zgjidhje për ta ndërpre këtë status-quo, këtë gjendje amulle të politikës, të proceseve zhvillimore, ekonomike, sociale”./Indeksonline/
