Kryeshefi i KUR “Prishtina”: Kërkojmë nga KEDS të mos e ndal rrymën, na krijon probleme në furnizim

Kryeshefi i Ujësjellësit “Prishtina”, Ilir Abdullahu ka thënë se mungesa e energjisë elektrike është duke shkaktuar probleme në furnizimin me ujë 24 orë për Prishtinën, Podujevën, Obiliqin, Fushë Kosova, Graçanicën.

Ai ka thënë për lajmi.net se kanë pasur reduktime të energjisë elektrike që nga e shtuna e kaluar, gjë që ka vështirësuar furnizimin me ujë nga fabrika në Shkabaj.

“E lusim KEDS-in që ta furnizojë me energji elektrike pa ndërprerë Ujësjellësin ‘Prishtina’, pasi që mungesa e energjisë është duke na shkaktuar telashe në furnizim të qytetarëve me ujë”, ka thënë Abdullahu.

Sipas tij, Ujësjellësi “Prishtina” është pagues i rregullt i energjisë elektrike, por edhe kërkojnë shërbime sepse është vështirësuar prodhimi i ujit.

“Nga e shtuna dhe deri mbrëmë herë pas herë kemi pasur ndërprerje të energjisë elektrike gjë që ka vështirësuar prodhimin e ujit në fabrikën e re në Shkabaj”, ka thënë Abdullahu për lajmi.net.

Kujtojmë se nga dje Ujësjellësi rajonal ka filluar furnizimin me ujë 24 orë për Prishtinën dhe disa qytete për rreth.

Në fabrikën e re kanë investuar Komuna e Prishtinës, Ujësjellësi i Prishtinës, Qeveria e Kosovës, Qeveria Zvicerane etj./Lajmi.net/