Punësimet: “Qeveria po numëron edhe njerëzit që kanë gjetur punë jashtë vendit”

Kryeministri Isa Mustafa është i bindur se gjatë dy viteve të fundit janë krijuar 40 mijë vende të reja të punës.

Njësoj mendon edhe ministri i Ministrisë së Financave, Avdullah Hoti i cili thotë se vetëm gjatë vitit 2016 janë punësuar 22 mijë persona, duke shtuar se ky numër është trefish më i lartë se në vitin 2014.

Mirëpo, ekonomistët shprehen skeptik në këtë aspekt.

Njohësi i çështjeve ekonomike, Ibrahim Rexhepi për Indeksonline thotë se këtu më shumë bëhet fjalë për numrin e personave që janë larguar nga tregu informal i punës, e jo për hapjen e vendeve të reja të punës.

Sipas tij, do të ishte mirë sikur kryeministri apo kushdo të tregoj se ku janë punësuar këta njerëz, në cilin sektor dhe të mos numërohen edhe ata që kanë gjetur punë jashtë vendit.

“Do të ishte shumë më me domethënie sikur kryeministri të na tregoj se ku u punësuan këta njerëz, në cilët sektor. Po ashtu, brenda kësaj shifre nuk duhet inkorporuar edhe kosovarët që  përmes marrëveshjeve të Kosovës me shtetet e tjera, kanë gjetur punë jashtë vendit. Ata nuk mund te llogariten se kane gjetur vend pune për shkak të zhvillimit të Kosovës dhe ata nuk kontribuojnë me asgjë në treguesit e tjerë ekonomik”, është shprehur Rexhepi.

Mirëpo, problem kryesor në këtë aspekt, sipas Rexhepit është hiperproduksioni i disa profileve. Sipas tij, shumë studentë kanë tituj akademik, por nuk janë të shkolluar në profesionet që aktualisht kërkohen.

“Mendoj se në mungesë të një pune të koordinuar ndërmjet ekonomisë dhe arsimit kemi hiperproduksion të disa profileve, të cilët për një kohë të gjatë mbeten  pa punë. Ata  mund të kenë tituj akademik, por nuk janë të shkolluar në profesionet  që aktualisht kërkohen. Mendoj se ndërmjet bizneseve dhe arsimit duhet të ketë një koordinim shumë më të mirë të planeve. Njëkohësisht duhet dhënë përparësi shkollimit profesional, madje duke filluar nga niveli i mesëm i arsimimit”, ka thënë ai./Indeksonline/