Miratohet projektligji për impiantin e ujërave të zeza në Podujevë, investim 35 milionë euro

Kuvendi i Republikës së Kosovës ka miratuar Projektligjin nr.10/L-014 për ratifikimin e Marrëveshjes së Kredisë ndërmjet Republikës së Kosovës dhe Banka Evropiane për Rindërtim dhe Zhvillim (BERZH), që i hap rrugë realizimit të projektit për ndërtimin e Impiantit për Trajtimin e Ujërave të Zeza në Podujevë.

Lajmin e ka bërë të ditur kryetari i Komunës së Podujevës, Shpejtim Bulliqi, i cili është shprehur i lumtur për këtë vendim të rëndësishëm për qytetin.

Sipas tij, projekti kap vlerën prej 35 milionë euro, ku 25 milionë euro janë siguruar përmes kredisë nga BERZH, ndërsa 10 milionë euro janë grant nga Korniza Investive e Bashkimit Evropian.

Bulliqi theksoi se ky investim do të ketë ndikim të madh jo vetëm në trajtimin e ujërave të zeza në Komunën e Podujevës, por edhe në përmirësimin e gjendjes mjedisore dhe pastrimin e lumenjve, ku aktualisht derdhen këto ujëra.

Ai gjithashtu ka falënderuar kryeministrin Albin Kurti për prioritizimin e këtij projekti, si dhe deputetët e Kuvendit të Kosovës që me votën e tyre mundësuan avancimin e tij.

Ndërtimi i impiantit konsiderohet një ndër projektet më të rëndësishme infrastrukturore dhe mjedisore për Podujevën, me ndikim të drejtpërdrejtë në përmirësimin e cilësisë së jetës për qytetarët.