Qeveria mblidhet sot: Në rend dite edhe rruga Prishtinë-Podujevë (Dokument)

Kryeministri i Kosovës, Albin Kurti, do të mbledhë sot kabinetin qeveritar për të shqyrtuar 17 pika të rendit të ditës. Për banorët e Llapit, pika më me rëndësi është ajo që ndërlidhet me vazhdimin e punimeve në rrugën nacionale.

Mbledhja e pestë e Qeverisë për vitin 2026, e cila pritet të fillojë në ora 11:00, përfshin vendime të rëndësishme që prekin dikastere të ndryshme, nga drejtësia e deri te infrastruktura.

Shpronësimet për rrugën Prishtinë-Podujevë

Sipas dokumentit të siguruar nga PodujevaPress.net, pika e 13-të e rendit të ditës parashikon shqyrtimin e propozim-vendimit preliminar për shpronësim për interes publik të pronave të paluajtshme që preken nga realizimi i Projektit: “Zgjerimi i Rrugës Nacionale M25, Prishtinë – Podujevë”. Ky hap është proceduralisht i domosdoshëm për të zhbllokuar pengesat pronësore dhe për të mundësuar rrjedhën e punimeve në këtë arterie kryesore për llapjanët.

Pikat tjera me rëndësi:

Përveç infrastrukturës, kabineti qeveritar do të shqyrtojë edhe:

• Kategoritë e luftës: Bartja e Zyrës për çështjet e kategorive të dala nga lufta e UÇK-së nga ZKM-ja në Ministrinë për Punë, Familje dhe Vlerat e Luftës Çlirimtare.

• Bashkëpunimi Ndërkombëtar: Kërkesa drejtuar Presidentes për autorizimin e Ministres së Drejtësisë për nënshkrimin e marrëveshjes për ndihmë juridike me Belgjikën.

• Mbështetja për Specialistët: Pagesat për specialistët me vetëfinancim, përfshirë edhe ata nga Lugina e Preshevës dhe Mali i Zi.

• Ekonomia: Themelimi i sistemit për zbatimin e mbështetjes së BE-së përmes Instrumentit për Reforma dhe Rritje Ekonomike për Ballkanin Perëndimor.

Mbledhja do të mbahet në ndërtesën e Qeverisë, ndërsa vendimet pritet të bëhen publike pas përfundimit të saj.