Komuna e Podujevës hap thirrje për mbështetje financiare të OJQ-ve në fushën e shërbimeve sociale

Komuna e Podujevës, përkatësisht Drejtoria e Shëndetësisë dhe Mirëqenies Sociale, ka hapur thirrjen publike për mbështetje financiare të projekteve dhe programeve të organizatave joqeveritare (OJQ) që veprojnë në territorin e komunës.

Kjo thirrje synon të mbështesë iniciativa që kontribuojnë në ofrimin e shërbimeve sociale, mbrojtjen dhe përfshirjen e personave me nevoja të veçanta, përkujdesjen ndaj fëmijëve pa përkujdesje prindërore, si dhe fuqizimin e familjeve dhe komunitetit përmes aktiviteteve rehabilituese, këshilluese dhe sensibilizuese.

Vlera totale e thirrjes është 20,000 euro. Mbështetja financiare për një projekt fillon nga 500 euro deri në 15,000 euro, ndërsa OJQ-të kanë të drejtë të aplikojnë vetëm me një projekt.

Afati për dorëzimin e aplikimeve është deri më 19 mars 2026, ndërsa projektet e përzgjedhura duhet të realizohen deri më 31 dhjetor 2026.

Për më shumë informacione lidhur me mënyrën e aplikimit, kompletimin e dokumentacionit dhe formularët e nevojshëm, të interesuarit mund të vizitojnë faqen zyrtare të komunës.