Afati për president drejt fundit, partitë nisin të mendojnë edhe për zgjedhje

Partitë politike kanë nisur të mendojnë edhe opsionin e zgjedhjeve të reja.

Kjo pasi afati për president po shkon drejt fundit, e deri më tash, nuk duhet të ketë kandidat që i siguron mbi 80 deputetë të qëndrojnë në sallë.

Shefi i grupit parlamentar të PDK-së, Arian Tahiri, tha dje se janë të gatshëm për zgjedhje të reja.

“Vazhdojmë me mbet brenda këtyre qëndrimeve, në kuptim të asaj që me diskutu në parim dhe standard se kush do të duhej t’i plotësonte këto atribute për të qenë president i vendit. Ende nuk është faza që kemi folur për emra të përveçëm, nuk kemi fol as dje, s’po flasim as sot. Por, vullneti i PDK-së është me kontribu në interes të institucioneve të vendit dhe shoqërisë, por nëse nuk ka me u mujt me u gjet dikush dhe nëse s’ka me pas disponim prej forcës kryesore politike, PDK është e gatshme gjithashtu me shku në zgjedhje”, tha Tahiri.

Tahiri, mes tjerash, u shpreh se nuk është diskutuar për marrëveshje politike. Por, se a e voton PDK-ja, Vjosa Osmanin edhe për një mandat pesë vjeçar për të udhëhequr me Presidencë, Tahiri duke mos u lëshuar siç tha në emra të përveçëm, nënvizoi se vendit nuk i bën mirë dikush që ka pasë qasje të njëanshme.

“Nuk është që është diskutu për marrëveshje politike, kjo çështje ka përfundu. Marrëveshje politike i kish ra kur është formu Qeveria. PDK-ja nuk është e interesuar për marrëveshje politike, por për me pas qasje proaktive, pozitive, mbështetëse për institucionet dhe mbështet një kandidat që plotëson këto standarde që i ceka. Nuk është se po du me u lëshu në emra të përveçëm, por mendoj që vendit nuk i bën nder një emër që ka pas qasje të njëanshme dje, dikush që përfaqëson veç një grup apo subjekt, por po flasim për dikë që është mbi partitë politike. Në këtë nivel jemi tu fol në parime dhe standarde, por nëse është e nevojshme dhe e arsyshme dhe kërkohet, padyshim që PDK do të nxjerrë edhe emra”, u shpreh Tahiri.

Ngjashëm kishte deklaruar edhe shefja e grupit parlamentar të LDK-së, Jehona Lushaku-Sadriu.

Ajo theksoi se dialogu është i domosdoshëm për çdo marrëveshje.

“Duhet të ulen dhe të vijnë te zgjidhja, që të mos ketë ngërç institucional apo destabilizim”, tha ajo.

Lushaku shtoi se partia është e gatshme për zgjedhje.

“Si parti jemi të gatshëm me shku në zgjedhje, por njëherë duhet të provohet të arrihet një marrëveshje”, u shpreh ajo.

Kurse, kryetari i AAK-së, Ramush Haradinaj, u shpreh se edhe Kurti ka synim zgjedhjet.

“Krejt çka i ka marrë prej Vjosës, fare s’po i investon për Vjosën. Dhe nëse e qet ka me qit veç me na çu në zgjedhje. Kurti është ka don me na çu në zgjedhje, dhe në zgjedhje po na çon. Dhe i kisha thënë presidentes fare mos i mbledh nënshkrimet, se është veç met të vonu, poshtru, me të qit në peshore. Kurti është ka ia luan lojën asaj, sepse po i dhimbet çka do koftë që e ka mbërri e sukses 51 për qind me ndihëm e Vjosës, po i dhimbset me ia kthy edhe qoftë një për qind. S’po ka mëshirë politike ndaj askujt, sepse po do një kontroll të plotë, ai dhe vetëm ai” – ka thënë ai.