Vazhdon vala e intervistimeve në Pejë, Gjakovë e Gjilan – ndërsa për Podujevën Prokuroria vazhdon të hesht

Hetimet për dyshimet serioze të manipulimit dhe falsifikimit të rezultateve zgjedhore po thellohen edhe më tej në disa komuna të Kosovës, ndërsa Podujeva vazhdon të mbetet jashtë vëmendjes së organeve të drejtësisë.

Sipas informatave të fundit, sot kanë vazhduar intervistimet intensive të komisionerëve zgjedhorë në Pejë, Gjakovë dhe Gjilan, në kuadër të hetimeve që po zhvillohen për parregullsi gjatë procesit të numërimit dhe administrimit të votave.

Burime nga strukturat e afërta me hetimin bëjnë të ditur se dhjetëra komisionerë janë ftuar për t’u intervistuar nga njësitë relevante hetimore, me qëllim të sqarimit të rolit të tyre në procesin zgjedhor.

Intervistimet po zhvillohen paralelisht në këto tri rajone dhe janë pjesë e një operacioni më të gjerë, i cili tashmë ka rezultuar me ndalime, sekuestrime të materialeve zgjedhore dhe pajisjeve elektronike, si dhe me hapje të disa rasteve penale.

Fokusi i hetimeve, sipas burimeve, është tek mospërputhjet në formularë, parregullsitë gjatë numërimit të votave dhe dyshimet për ndërhyrje të qëllimshme në rezultate.

Në këtë situatë, mbetet e pashpjegueshme heshtja totale për Podujevën, komunë në të cilën procesi i rinumërimit ende nuk ka përfunduar plotësisht dhe ku janë evidentuar mospërputhje gjatë numërimit, por deri më tani nuk ka asnjë njoftim për intervistime, hetime apo masa konkrete nga Prokuroria.

Ndërsa Prokuroria dhe Policia e Kosovës po shtrijnë hetimet në disa rajone të vendit, qytetarët e Podujevës po mbesin pa përgjigje për një pyetje thelbësore:

Pse po hetohen Peja, Gjakova dhe Gjilani, ndërsa për Podujevën nuk ka asnjë veprim?

Mungesa e veprimeve institucionale për Podujevën po shton dyshimet për trajtim selektiv dhe po e cenon besimin e qytetarëve në drejtësinë zgjedhore.

PodujevaPRESS.net do të vazhdojë të kërkojë përgjigje zyrtare nga institucionet kompetente dhe të informojë publikun për çdo zhvillim të ri.