LAJMI I FUNDIT: 34 kryesues zgjedhorë ndalohen për 48 orë në Mitrovicë për dallavere votash – A pritet goditja e radhës në Podujevë?

Një tërmet i vërtetë ka goditur administrimin e zgjedhjeve në rajonin e Mitrovicës, ku Prokuroria ka nisur një aksion masiv kundër manipulimeve me votën e qytetarëve. Prokuroria Themelore e Mitrovicës ka njoftuar zyrtarisht se ka ndaluar për 48 orë 34 kryesues të vendvotimeve, nën dyshimin e bazuar për “dallavere me vota”, ndërsa në target për intervistim janë gjithsej 43 persona. Këta zyrtarë dyshohen se kanë tjetërsuar vullnetin e qytetarëve brenda kutive të votimit, duke u bërë pjesë e skemave të vjedhjes së votave për kandidatë të caktuar.

Ky aksion i bujshëm ka alarmuar opinionin publik edhe në Podujevë, veçanërisht pas përfundimit të procesit të rinumërimit të 110 vendvotimeve në këtë komunë. Të dhënat e fundit nga QNR kanë nxjerrë në dritë mospërputhje skandaloze të votave brenda listave të partive politike në Podujevë. Kandidatëve si Vendenis Lahu e Ejup Maqedonci u janë hequr qindra vota (përkatësisht 407 dhe 389), ndërsa të tjerëve si Driton Hyseni u janë shtuar mbi 100 vota pas saktësimit të procesit. Luhatje të dyshimta janë vërejtur edhe te kandidatët e LDK-së e PDK-së, ku pas rinumërimit kanë rezultuar me dhjetëra vota më pak ose më shumë sesa ishin shënuar fillimisht në procesverbalet e komisionerëve llapjanë.

Pas aksionit të prokurorisë në Mitrovicë, sytë tashmë janë kthyer nga Prokuroria Themelore në Prishtinë. Burime pranë organeve të rendit bëjnë me dije se ekziston një mundësi e madhe që edhe Podujeva të futet në listën e hetimeve penale. Duke parë që rinumërimi vërtetoi se votat u tjetërsuan në dëm të disave dhe në favor të të tjerëve, dyshimet për manipulim nga ana e komisionerëve në Podujevë janë tejet të larta. Mbetet të shihet nëse orët në vijim do të sjellin fletëarreste edhe për zyrtarët zgjedhorë në komunën tonë, të cilët guxuan të prekin votën e shenjtë të qytetarit.

PodujevaPress.net