Podujeva i bashkohet thirrjes për drejtësi, marshim më 17 shkurt në Prishtinë

Organizata e Veteranëve të Luftës në Podujevë, Organizata e të Burgosurve Politikë dhe Shoqata e Familjeve të Dëshmorëve kanë shprehur mbështetje të hapur për marshin qytetar “Drejtësi, jo politikë”, i cili do të mbahet më 17 shkurt 2026 në Prishtinë.

Në një deklaratë publike, këto organizata theksuan se përkrahja buron nga sakrifica e atyre që dhanë gjithçka për lirinë e Kosovës dhe nga nevoja për mbrojtjen e dinjitetit të luftës çlirimtare. Sipas tyre, marshimi synon drejtësi të vërtetë dhe të paanshme, larg ndikimeve politike.

Mbështetje për këtë protestë ka dhënë edhe Kryetari i Komunës së Podujevës, Shpejtim Bulliqi, i cili ka pritur përfaqësuesit e nismës dhe ka shprehur përkrahje institucionale për marshin. Nga Podujeva u vlerësua se kjo mbështetje forcon një front qytetar gjithëpërfshirës, pa dallime, në kërkesën për respektimin e së vërtetës historike dhe të vlerave të luftës çlirimtare.

Organizatorët kanë bërë thirrje që qytetarët të bashkohen më 17 shkurt në Prishtinë, duke theksuar se mesazhi i protestës është i qartë dhe i përbashkët. Drejtësi, jo politikë.