Prokuroria zbulon manipulime masive me vota në Malishevë – 15 të arrestuar, mbi 17 mijë vota diferencë

Detaje të reja janë bërë publike sot nga Kryeprokurori i Prokurorisë Themelore në Gjakovë, Enis Gashi, lidhur me aksionin e zhvilluar për dyshimet e manipulimit të votave në Komunën e Malishevës.

Sipas Gashit, në Malishevë kanë qenë gjithsej 75 vendvotime, ku nga verifikimet e deritanishme është konstatuar se 9 mijë e 57 vota janë shtuar, ndërsa 7 mijë e 996 vota janë hequr në mënyrë të kundërligjshme. Në total, diferenca e konstatuar arrin në 17 mijë e 53 vota, shifër kjo që cilësohet si jashtëzakonisht serioze nga organet e drejtësisë.

Në kuadër të hetimeve, Prokuroria ka intervistuar 18 kryesues të vendvotimeve dhe 50 komisionerë, ndërsa për shkak të dyshimeve të bazuara, 15 kryesues janë arrestuar dhe ndaluar për 48 orë.

Kryeprokurori Gashi bëri të ditur se për të dyshuarit e tjerë, Prokuroria do të vendosë në vijim për masat e sigurisë, në varësi të zhvillimit të hetimeve dhe provave të mbledhura.