Rinumërimi në Podujevë ende i papërfunduar – vetëm 18 nga 110 vendvotime të rinumëruara

Procesi i rinumërimit të votave në komunën e Podujevës vazhdon të mbetet i papërfunduar. Sipas të dhënave zyrtare të publikuara në faqen e Komisionit Qendror të Zgjedhjeve (KQZ), deri më tani janë rinumëruar vetëm 18 vendvotime nga gjithsej 120, që përbëjnë rreth 16% të totalit.

Fillimisht, rinumërimi kishte nisur me 11 vendvotime, ku sipas rezultateve zyrtare të KQZ-së, janë evidentuar parregullsi të shumta dhe mospërputhje të votave, çka edhe çoi në zgjerimin e procesit të rinumërimit. Më pas, numri i vendvotimeve të përfshira në rinumërim u rrit në 18, por që nga ai moment nuk ka pasur asnjë përditësim apo lëvizje të re në proces.

Megjithëse KQZ deklaron se rinumërimi është duke vazhduar, për komunën e Podujevës nuk ka asnjë njoftim të ri zyrtar, as për afatet kohore dhe as për arsyet e stagnimit të procesit.

Kjo gjendje ka ngritur pikëpyetje në opinionin publik, duke qenë se Podujeva mbetet ndër komunat e pakta ku rinumërimi ende nuk ka përfunduar, pavarësisht se parregullsitë janë të dokumentuara në platformën zyrtare të KQZ-së.

Vonesa në përfundimin e rinumërimit po e bën procesin të paqartë dhe po shton kërkesat për një sqarim të menjëhershëm institucional lidhur me ecurinë reale të rinumërimit në Podujevë.

PodujevaPRESS.net do të vazhdojë të informojë opinionin për çdo zhvillim të ri nga burimet zyrtare.