Në Kosovë veprimi mafioz është bërë kulturë, përgjigjja është vetëm një lëvizje e re politike kundër mafisë dhe për shtet ligjor

Opinion: Behram Behluli

Në Kosovë, veprimi mafioz tashmë është shndërruar në kulturë. Përgjigjja e vetme ndaj kësaj gjendjeje është krijimi i një lëvizjeje të re politike kundër mafisë dhe në mbrojtje të shtetit ligjor.

Kandidatët për deputetë të Kuvendit të Kosovës, hajna me strukturë të organizuar, janë në krye të organizimeve kriminale për vjedhjen e votave. Secili prej tyre ka ndërtuar rrjete të veta, me komisionerë dhe vëzhgues brenda strukturave kriminale, sepse vjedhja e votës nuk mund të ndodhë pa marrëveshje dhe organizim në qendrat e numërimit.

Çdo tendencë për të marrë në përgjegjësi vetëm nënshkruesit e procesverbaleve është përpjekje për t’i amnistuar organizatorët kryesorë, e ata janë vetë kandidatët për deputetë.

Prokurorët duhet të marrin guximin, sepse ligji i obligon, që t’i çmontojnë këto organizma kriminalë brenda partive politike. Në këto raste, vëzhguesi dhe komisioneri janë thjesht argatë të kryekriminelëve, kandidatëve për deputetë.

Kryekriminelë janë të gjithë ata që nuk zgjedhin mjete për të arritur qëllimin e marrjes së pushtetit. Sot vjedhin votën, nesër shtetin.

Ky soj njerëzish është njësoj i dëmshëm si në pushtet ashtu edhe në opozitë. Në pushtet vjedhin institucionet, në opozitë përfitojnë subvencione.

Të gjithë kandidatët për deputetë që kanë organizuar vjedhjen e votave, nga secila parti politike në Kosovë, janë mafia e këtij vendi. Me mafian nuk ka shtet ligjor dhe shpresa për përmirësim është e kotë. Vendit i duhet një lëvizje e re, tani ose kurrë. Është koha e rilindjes, koha e vetëdijes për luftë kundër mafisë politike në Kosovë. Po bëhet e qartë se këtë luftë nuk mund ta bëjnë as pushtetarët e sotëm, as ata të djeshëm.

Nga këto subjekte dhe liderë aktualë të presësh ndryshim është njësoj si të jetosh me shpresën se Kurbani do të shtojë peshë ditën e Bajramit.

Kur nuk ka ndryshim, duhet organizim dhe bashkim i të gjithë njerëzve që e duan këtë vend. Kosovës i duhet një lëvizje politike kundër mafisë politike. Vetëm kjo mund ta shpëtojë këtë vend. Më mirë sot se nesër, sepse nesër nuk do të mbetet asgjë për t’u shpëtuar.