SKANDAL: Edhe nën vëzhgimin e kamerave “avullohen” votat në Podujevë – A po vidhet vullneti i qytetarëve?

Pas publikimit të rezultateve të para nga rinumërimi i 11 vendvotimeve në Podujevë, ku u vërejtën mospërputhje flagrante të votave për kandidatët, lind pyetja: Si guxuan komisionerët të tjetërsojnë votat edhe nën prezencën e kamerave? PodujevaPRESS sjell detaje!

Procesi i fundit i rinumërimit në Qendrën e Numërimit dhe Rezultateve (QNR) ka nxjerrë në pah një realitet tronditës për procesin zgjedhor në komunën tonë. Ndryshimet drastike të votave për kandidatët brenda vetëm 11 vendvotimeve (nga 110 gjithsej sa ka Podujeva) ngrenë dyshime serioze për një vjedhje të organizuar dhe manipulim të vullnetit qytetar.

Ku ishin zyrtarët dhe vëzhguesit?

Është e pashpjegueshme se si në një proces që supozohet të jetë transparent dhe i monitoruar me kamera, komisionerët kanë “guxuar” të bëjnë kalkulime të tilla me votat e kandidatëve.

Ku ishin zyrtarët e KKZ-së (Komisionit Komunal Zgjedhor)? Çfarë bënë vëzhguesit e partive politike dhe ata të shoqërisë civile që ishin të pranishëm në ato vendvotime?

Heshtja apo mosveprimi i tyre në momentin e numërimit fillestar ka lejuar që qindra vota të tjetërsohen, duke dëmtuar rëndë procesin demokratik.

Prokuroria duhet marrë masa urgjente!

Kjo nuk mund të kalojë vetëm si një “gabim teknik”. Ky është sulm mbi votën e lirë. 

Nga shoqeria Civile në Podujevë i është kërkuar Prokurorisë së Shtetit që të nisë hetimet menjëherë për komisionerët e përfshirë në këto 11 vendvotime ku u vërejtën parregullsi. Përgjegjësit duhet të dalin para drejtësisë për të mbrojtur integritetin e zgjedhjeve. Ata po kërkojnë rinumërim TOTAL për Podujevën.

Nëse në vetëm 10% të vendvotimeve (11 nga 110) u gjetën këto mospërputhje skandaloze, çfarë po ndodh me 99 vendvotimet e tjera?

Qytetarët e Podujevës meritojnë transparencë të plotë. Nuk mjafton vetëm një rinumërim i pjesshëm. Podujeva duhet të shkojë në rinumërim total të të gjitha 110 vendvotimeve. Vetëm kështu mund të kthehet besimi te vota dhe të sigurohemi që çdo kandidat ka marrë atë që i takon me meritë, e jo me “pazare” komisionerësh.

PodujevaPRESS.net do të vazhdojë të denoncojë çdo parregullsi deri në zbardhjen e plotë të këtij skandali.