Rinumërimi i pjesshëm në Podujevë mund të çojë drejt rinumërimit total, keqpërdorim me vota mes kandidatëve – FOTO

Procesi i rinumërimit të votave në Podujevë ka nxjerrë në pah dallime të konsiderueshme në rezultatet për kandidatët e Lëvizjes Vetëvendosje. Deri tani janë rinumëruar vetëm 3 nga gjithsej 11 kuti votimi, por ndryshimet e evidentuara janë të tilla që mund ta shtyjnë procesin drejt një rinumërimi të plotë në këtë komunë.

Sipas të dhënave të publikuara në platformën zyrtare të KQZ-së, kandidati Albin Kurti aktualisht figuron me 508 vota, që para rinumërimit kishte 541, duke pësuar rënie prej 33 votash. Glauk Konjufca ka 376 vota, nga 392 sa kishte më herët, pra 16 vota më pak.

Saranda Bogujevci ka aktualisht 289 vota, nga 299 që kishte para rinumërimit, me një rënie prej 10 votash. Drita Pajaziti ka rënë nga 303 në 246 vota, që nënkupton humbje prej 57 votash.

Fitim Haziri tani ka 238 vota, ndërsa më parë kishte 283, pra 45 vota më pak. Driton Hyseni është i vetmi kandidat që ka shënuar rritje, nga 217 në 235 vota, me 18 vota më shumë pas rinumërimit.

Vendenis Lahu ka pësuar rënien më të madhe, nga 320 në 214 vota, që janë 106 vota më pak, ndërsa Adelina Stublla ka rënë nga 285 në 200 vota, ose 85 vota më pak.

Këto ndryshime kanë ndodhur pas rinumërimit të vetëm tre kutive të votimit, ndërkohë që tetë kuti të tjera ende nuk janë hapur. Për shkak të dallimeve të theksuara, burime brenda procesit zgjedhor nuk e përjashtojnë mundësinë që Podujeva të shkojë drejt rinumërimit të plotë të votave.

Vendimi për një hap të tillë i takon Komisionit Qendror të Zgjedhjeve dhe varet nga ecuria e mëtejme e procesit dhe gjetjet zyrtare.

PodujevaPRESS do të vazhdojë ta përcjellë nga afër zhvillimin e rinumërimit dhe do të raportojë për çdo vendim apo ndryshim zyrtar.