Kolona kilometrike dhe pritje deri në 2 orë e gjysmë në Vranidoll – punimet në urë thuajse të ndalura, Ministria pa reagim

Llapjanët po përballen çdo ditë me kolona të gjata dhe pritje të stërzgjatura në fshatin Vranidoll, si pasojë e punimeve të papërfunduara në urën kryesore të këtij aksi rrugor. Sipas qytetarëve, pritja për të kaluar këtë segment arrin deri në dy orë e gjysmë, duke shkaktuar vonesa serioze për punëtorët, bizneset dhe udhëtarët e shumtë që e shfrytëzojnë këtë magjistrale.

Edhe pse ura është e dëmtuar dhe ndërtimi i saj ka filluar, në terren nuk vërehet asnjë aktivitet konkret pune, ndërsa makineritë dhe punëtorët mungojnë pothuajse tërësisht. Kjo situatë ka rritur ndjeshëm pakënaqësinë e qytetarëve, të cilët e cilësojnë gjendjen si të papranueshme dhe të rrezikshme.

Banorë dhe vozitës të shumtë shprehen se deri afër Vitit të Ri ka pasur një intensitet më të madh të punimeve, ndërsa pas 28 dhjetorit, kur u mbajtën zgjedhjet e përgjithshme në Kosovë, ritmi i punës ka rënë dukshëm, për të mos thënë është ndalur fare.

Reagimet në rrjete sociale janë të shumta, me qytetarë që kërkojnë përgjegjësi dhe ndërhyrje urgjente nga institucionet përkatëse. Megjithatë, nga Ministria e Infrastrukturës nuk ka asnjë reagim zyrtar, pavarësisht ankesave të vazhdueshme.

Kjo rrugë magjistrale ka rëndësi të veçantë strategjike, pasi lidh rajonin e Llapit me Prishtinën dhe shërben si aks i rëndësishëm që çon drejt kufirit me Serbinë, duke e bërë bllokimin edhe më problematik për qarkullimin dhe ekonominë lokale.

Qytetarët kërkojnë rifillimin urgjent të punimeve, rritjen e numrit të punëtorëve në terren dhe një afat të qartë për përfundimin e urës, në mënyrë që të shmanget kaosi i përditshëm dhe rrezikimi i sigurisë në trafik.

Podujeva Press do të vazhdojë të përcjellë nga afër këtë çështje dhe të kërkojë përgjigje nga institucionet përgjegjëse.