U mbajt mbledhja inauguruese e Kuvendit të Komunës së Podujevës

Kuvendi i Komunës së Podujevës ka mbajtur sot mbledhjen inauguruese të legjislaturës së re, në të cilën u betuan anëtarët e rinj të Kuvendit dhe Kryetari i Komunës, Shpejtim Bulliqi.

Seanca solemne u kryesua nga anëtari më i vjetër i legjislaturës, Isak Ejupi nga LDK, dhe nisi me intonimin e himnit kombëtar dhe atij shtetëror. Fillimisht u themelua Komisioni për verifikimin e mandatave të anëtarëve të rinj, ndërsa pas verifikimit të tyre, kuvendarët dhanë betimin dhe nënshkruan deklaratat për marrjen e mandatit.

Betimin e bëri edhe Kryetari Bulliqi, i cili në fjalën e tij u zotua se do të punojë me të gjithë anëtarët e Kuvendit pa dallime partiake, për të shtyrë përpara projektet që zhvillojnë Komunën dhe mbrojnë interesin publik.

“Zotohem para llapjanëve se Zyra e Kryetarit do të udhëhiqet nga parimi i gjithëpërfshirjes dhe trajtimit të barabartë. Shërbimi për qytetarët do të jetë detyra jonë e përditshme”, tha Bulliqi, duke i ftuar qytetarët dhe profesionistët llapjanë të kontribuojnë me ide dhe ndihmë në zhvillimin e Komunës.

Ai theksoi se edhe gjatë mandatit të kaluar janë realizuar projekte të mëdha në ekonomi, infrastrukturë, arsim, shëndetësi dhe fusha të tjera, ndërsa premtoi vazhdimin e këtij ritmi edhe në mandatin e ri për transformimin e Podujevës.

Në fund të seancës, kryetari dhe anëtarët e Kuvendit kryen homazhe në shtatoret e qytetit dhe në Kompleksin Memorial të Dëshmorëve në fshatin Penuhë.