Podujevë: Ish-asambleisti akuzon: A po pritet diaspora që të shtrohet asfalti në urë?

Ish-asambleisti i Kuvendit Komunal të Podujevës, Blerim Maçastena, ka reaguar ashpër lidhur me vonesat në asfaltimin e urës në fshatin Besi, në magjistralen Prishtinë–Podujevë.

Sipas tij, punimet në urë kanë përfunduar para më shumë se një muaji, por asfalti ende nuk është shtruar pa asnjë arsye të arsyeshme.

Maçastena ngre dyshime se vonesa po bëhet qëllimisht, duke thënë se po pritet ardhja e diasporës për të krijuar përshtypjen se po punohet intensivisht.

“Kjo urë në Besi ka përfunduar me punime më shumë se një muaj. Asfaltin nuk po e shtrojnë, sepse – sipas asaj që po dëgjoj – po thonë ‘e shtrojmë kur të vijnë mërgimtarët’. A po pritet diaspora e fundvitit apo çfarë? Kështu po rrejn, kinse po punojnë, vetëm që të mashtrojnë kur të vijnë mërgimtarët,” ka deklaruar Maçastena.

Ai ka kërkuar transparencë dhe përgjegjësi nga institucionet lokale dhe qendrore, duke thënë se qytetarët nuk duhet të trajtohen me justifikime, por me punë konkrete dhe në kohë.