19-vjeçari arrestohet për vjedhje të rëndë në Podujevë – dyshohet se vodhi para nga vetura, shtëpia dhe xhamia e lagjes

Një rast i rëndë vjedhjeje është zbuluar në Podujevë, ku një 19-vjeçar dyshohet se ka kryer disa vjedhje në periudhën 22 tetor – 2 nëntor 2025. Burime të besueshme nga strukturat e hetimit kanë bërë të ditur për Sinjalin se rasti është ricilësuar si “Vjedhje e rëndë”, ndërsa i dyshuari është ndaluar për 48 orë.

Sipas rezultatit hetimor, ankuesi I. H ka deklaruar më 2 nëntor 2025 se një person i kishte vjedhur para nga vetura dhe shtëpia, në një shumë prej 1,050 eurosh.

Hetimet kanë zbuluar se i njëjti person dyshohet të ketë hyrë edhe në një xhami në rrugën “Jusuf Koliqi”, ku kishte larguar kahjen e kamerës së sigurisë dhe kishte kontrolluar kutinë e kontributeve me qëllim vjedhjeje.

Pas analizimit të provave, njësia e hetimeve në Podujevë ka identifikuar dhe arrestuar një rreth 19-vjeçar, i cili është intervistuar në prani të avokatit mbrojtës.

Me vendim të Prokurorit të Departamentit të Përgjithshëm, vepra është ricilësuar nga “Vjedhje” në “Vjedhje e rëndë”, dhe ndaj të dyshuarit është caktuar masa e ndalimit për 48 orë.

Hetimet po vazhdojnë për të verifikuar nëse i dyshuari ka qenë i përfshirë edhe në raste të tjera vjedhjeje në zonën e Podujevës gjatë muajve të fundit.