Thikë në oborrin e shkollës në Podujevë – i dyshuari 17-vjeçar mohon pronësinë

Një incident shqetësues është regjistruar të enjten në Podujevë, ku në oborrin e një shkolle të mesme është gjetur një mjet i mprehtë – thikë, që dyshohet se i përkiste një nxënësi të mitur.

Burime të sigurta të Sinjalit bëjnë të ditur se rasti ka ndodhur rreth orës 13:20 në Rrugën “Xhemajl Mustafa”, përkatësisht në oborrin e shkollës së mesme “Aleksandër Xhuvani”, ku disa dëshmitarë kanë raportuar se thika e gjetur në tokë i përkiste A.M. rreth 17-vjeçar.

I mituri është shoqëruar në stacionin policor, ku është intervistuar në prani të avokatit mbrojtës dhe zyrtarit të Qendrës për Punë Sociale, mirëpo ai ka mohuar se thika ishte e tij.

Mjeti i mprehtë është sekuestruar si provë materiale, ndërsa me konsultim të prokurorit kujdestar për të mitur, z. Fatmir Behrami, rasti është inicuar si “Mbajtje në pronësi, kontroll ose posedim të paautorizuar të armës”.

I dyshuari është liruar në procedurë të rregullt, ndërsa hetimet po vazhdojnë për të zbardhur plotësisht rrethanat e rastit.