Podujevë: Vendvotimi 1807/02 i shkollës “Ibrahim Rugova” dërgohet në rinumërim

Paneli Zgjedhor për Ankesa dhe Parashtresa (PZAP) ka urdhëruar rinumërimin e vendvotimit 1807/02, që i përket klasës numër 2 në shkollën fillore “Ibrahim Rugova” në Podujevë.

Sipas njoftimit të Komisionit Qendror të Zgjedhjeve (KQZ), rinumërimi ka nisur në Qendrën e Numërimit dhe Rezultateve (QNR), pas përfundimit të procesit të numërimit të votave nga jashtë vendit.

Në total, pesë vendvotime nga disa komuna të Kosovës janë dërguar për rinumërim me vendim të PZAP-it. Bëhet fjalë për:

Mitrovicë e Jugut (1110/01 dhe 1110/06)

Kamenicë (1019/01 dhe 1020/01)

Podujevë (1807/02)

KQZ ka bërë të ditur se, krahas rinumërimit, gjatë ditës së sotme në QNR do të nisë edhe numërimi i votave me kusht dhe votave të personave me nevoja të veçanta.

Votimi me kusht është realizuar në 54 vendvotime speciale në 38 komuna të vendit, ndërsa votimi i personave me nevoja të veçanta është zhvilluar jashtë vendvotimeve përmes ekipeve mobile gjatë ditës së zgjedhjeve.