Ndryshimi që po ndodh në Podujevë: Ish-drejtuesit e Bulliqit dalin në përkrahje të Ekrem Hysenit

Në prag të zgjedhjeve të së dielës, skena politike në Podujevë ka marrë një kthesë të papritur. Katër ish-drejtorë të qeverisjes së Shpejtim Bulliqit – Ajet Poterra, Bedri Maçastena, Besnik Mulliqi dhe Bujar Hasani – kanë dalë publikisht në përkrahje të kandidatit të Lidhjes Demokratike të Kosovës, Dr. Ekrem Hyseni.

Ky veprim ka ngjallur reagime të shumta në opinionin publik, duke u parë nga shumë qytetarë si shenjë e qartë e ndryshimit që po ndodh në Podujevë. Sipas analistëve lokalë, kjo përkrahje vjen si pasojë e pakënaqësive të akumuluara ndaj qeverisjes aktuale, të cilën e kanë karakterizuar akuzat, hetimet dhe mosmbajtja e premtimeve të dhëna para qytetarëve.

“Ora e ndryshimit të madh po afron”, ka deklaruar Hyseni në reagimin e tij, duke theksuar se kjo përkrahje është dëshmi se edhe njerëzit që dikur ishin pjesë e pushtetit të kaluar tashmë e kanë kuptuar nevojën për kthim të besimit te zhvillimi dhe normaliteti.

Në anën tjetër, qytetarët e Llapit ndodhen para një zgjedhjeje të qartë – mes vazhdimit të qeverisjes aktuale apo fillimit të një kapitulli të ri që, sipas përkrahësve të Doktor Hysenit, do t’i kthejë qytetit dinjitetin, transparencën dhe ritmin e zhvillimit.

Të dielën, më 12 tetor, llapjanët do të vendosin për drejtimin që do ta marrë Podujeva në katër vitet e ardhshme.