Ajet Potera: Të dielën votojeni Dr. Ekrem Hysenin – njeriun me integritet që i jep kuptim Podujevës!

Ish-komandanti i Ushtrisë Çlirimtare të Kosovës dhe ish-kandidati për kryetar të Komunës së Podujevës nga Vetëvendosje në vitin 2017, Ajet Potera, ka reaguar përmes një postimi të gjatë ku ka folur për politikën, rolin e individit në subjektet politike dhe besimin në vlera e integritet.

Potera, i cili për një vit ka qenë edhe drejtor i Inspektoratit në qeverisjen e Shpejtim Bulliqit, thekson se përvoja e tij politike dhe jetësore e ka mësuar të besojë gjithmonë te individi dhe jo domosdoshmërisht te subjekti politik.

“Që nga përfundimi i luftës dhe vendosja e pluralizmit politik, tashmë për 26 vite, kam besuar gjithmonë te individi, te njeriu i duhur dhe jo domosdoshmërisht te subjekti politik. Përvoja ka treguar se nëse një subjekt politik nuk ka njerëz të mirë, të dëshmuar dhe me integritet në kryesi e në udhëheqje, atij subjekti i zbehet kuptimi,” – ka shkruar Potera.

Ai shton se në realitetin politik kosovar, qytetarët shpesh identifikohen me individin dhe jo me subjektin, duke përmendur si shembull kryeministrin Albin Kurti.

“Shembulli më i qartë është ai i Albinit, qytetarët besojnë te Albini, jo domosdoshmërisht te subjekti që ai përfaqëson. Nëse ai do të largohej nga partia, do të shihej qartë se sa vota do të mbeteshin vetëm për subjektin.”

Potera vlerëson se personalitetet me integritet, siç e cilëson Dr. Ekrem Hysenin në Podujevë, janë shembuj se si një individ mund t’i japë kuptim dhe besueshmëri një subjekti politik.

Në fund, ai përmbyll reagimin me një mesazh të fortë patriotik:

“Unë besoj në Kosovën, prandaj kurrë nuk gaboj dhe kurrë nuk humb, sepse i besoj Kosovës!

Kosova është e para, para të gjithave!

Prandaj, ata që mendojnë kështu, unë i mbështes.”