Dr. Ekrem Hyseni, zëri i qetë që po fiton zemrat e llapjanëve

Ndërsa fushata zgjedhore në Podujevë po i afrohet fundit, një emër po spikat gjithnjë e më shumë si simbol i qetësisë, urtësisë dhe përkushtimit qytetar Dr. Ekrem Hyseni.

I lindur në Batllavë, nga një familje me traditë të fortë patriotike e me familjarë të vrarë e të plagosur gjatë luftës, Dr. Hyseni është shembull i njeriut që ka kaluar sprova, por ka mbetur modest e i përulur ndaj qytetarëve. Ai përfaqëson një gjeneratë të re të politikanëve që flasin me fakte, me etikë dhe me respekt, jo me arrogancë.

Gjatë një debati publik, kundërkandidati Shpejtim Bulliqi kishte nënçmuar fjalët e tij për sakrificën e familjeve të luftës, duke u shprehur për vëllaun e tij Agronin: “Ku invalid në Koliq, a?” — një deklaratë që është pritur me revoltë, sidomos nga familjet e dëshmorëve dhe të mbijetuarit e masakrës së Koliqit, e cila është masakra e dytë më e madhe në Kosovë.

Në vend që të përgjigjej me të njëjtën gjuhë, Dr. Hyseni zgjodhi rrugën e dinjitetit, heshtjen fisnike dhe përgjigjen me vepra.

Para katër vitesh, gara mes tyre ishte jashtëzakonisht e ngushtë. Në rundin e parë të zgjedhjeve, Hyseni kishte marrë 44.20% të votave (16,925 vota), ndërsa Bulliqi 44.16% (16,907 vota) – vetëm 18 vota dallim. Megjithatë, në balotazh, Bulliqi arriti të fitojë me 52% kundrejt 48% të Hysenit, me një epërsi prej pak më shumë se 1,000 vota.

Në atë kohë, disa zyrtarë lokalë të PDK-së kishin ndihmuar indirekt që Bulliqi të siguronte fitoren në balotazh. Por kësaj radhe, duket se situata ka ndryshuar ndjeshëm.

Burime të PodujevaPRESS, që kanë parë matje të brendshme elektorale të zhvilluara nga dy subjekte politike në nivel vendi, bëjnë të ditur se Ekrem Hyseni aktualisht prin bindshëm ndaj Shpejtim Bulliqit në Podujevë, pas një rritjeje të vazhdueshme të mbështetjes në ditët e fundit të fushatës.

Katër vite më parë, ai humbi përballë Bulliqit në një rrethanë ku një pjesë e opozitës ishte e përçarë dhe ku një pjesë e votave shkoi në drejtim tjetër. Por sot, atmosfera është ndryshe.

Në qytet dhe në fshatra, ndjehet qartë një frymë bashkimi e ndryshimi. Edhe qytetarë që dikur i dhanë besim Bulliqit, tashmë po kërkojnë kthesë – një udhëheqës që i dëgjon, jo që i nënvlerëson.

Dr. Ekrem Hyseni, si mjek i njohur dhe humanist, po shihet si njeriu që mund t’i kthejë Podujevës qeverisjen me kulturë, zhvillimin me plan dhe respektin ndaj qytetarëve.

Në çdo takim, ai pritet me entuziazëm, sepse qytetarët ndjejnë se për herë të parë pas shumë vitesh, përballë kanë një njeri që nuk e përdor fjalën për të ndarë, por për të bashkuar.

Në këtë fushatë, zëri i qetë i Dr. Hysenit po bëhet zëri i Podujevës – një qytet që kërkon dinjitet, punë e ndryshim të vërtetë.