Ekrem Hyseni reagon pas mungesës së Bulliqit në debat: “Paniku nga humbja e pushtetit po e shtynë nga skandali në skandal”

Kandidati i Lidhjes Demokratike të Kosovës (LDK) për kryetar të Podujevës, Ekrem Hyseni, ka reaguar pas mungesës së Shpejtim Bulliqit në debatin e mbrëmshëm në televizionin “Klan Kosova”.

Në një postim në rrjete sociale, Hyseni ka thënë se ndërsa ai dhe kandidatët tjerë ishin të ftuar për të debatuar rreth programeve qeverisëse për katër vitet e ardhshme, kryetari në ikje ka zgjedhur të mos marrë pjesë.

“Siç e keni parë, në këtë debat nuk ishte i pranishëm kryetari në ikje. Para këtij debati, kishte qenë në një studio tjetër televizive, ku i ishte mundësuar të spekulonte e të provonte t’i mashtronte qytetarët siç ka bërë për katër vite radhazi,” ka shkruar Hyseni.

Sipas tij, Bulliqi ndodhet në panik nga humbja e pushtetit, gjë që po e shtynë “nga skandali në skandal”.

“Anipse, kishte shkuar për të mashtruar e propaganduar, ai paska përfunduar në një deklaratë tjetër skandaloze. Paniku nga humbja e pushtetit po e shtynë nga skandali në skandal. Është mirë që qytetarët tanë po e shohin fytyrën e vërtetë të tij!”, ka shtuar Hyseni.

Në fund, kandidati i LDK-së është shprehur se qytetarët e Podujevës kanë shpresë dhe dritë për ndryshim:

“Ka dritë, ka shpresë për qytetarët tanë, sepse ky është i vetëm, është vetëm një, asnjë tjetër s’mendon si ky.”