Ngutia e Shpejtim Bulliqit për fillime punimesh në prag të zgjedhjeve ngre dyshime për panik elektoral

Në kohën kur fushata zgjedhore është drejt fundit dhe zgjedhjet lokale në Kosovë mbahen të dielën, më 12 tetor, kryetari në detyrë i Podujevës, Shpejtim Bulliqi, po shfaq një vrull të pazakontë për prezantimin e fillimeve të punimeve në terren.

Sot, Bulliqi ka bërë publike nisjen e ndërtimit të dy anekseve shkollore në shkollat “Enver Maloku” dhe “Dr. Ibrahim Rugova” në qytet – projekte që sipas tij kapin vlerën e 1.2 milionë eurove dhe që, siç thotë, do të krijojnë kushte për zhvillimin e mësimit gjithëditor.

Por, kjo nguti për fillime punimesh pikërisht në prag të zgjedhjeve ka ngjallur reagime dhe dyshime te qytetarët.

Shumëkush pyet pse këto punime po nisin tani, në fillim të vjeshtës, kur mund të ishin realizuar gjatë pranverës apo verës, periudhë shumë më e përshtatshme për ndërtime të tilla.

Ekspertë lokalë theksojnë se fillimi i punimeve në këtë fazë jo vetëm që pengon zhvillimin normal të mësimit, por mund të paraqesë edhe rrezik për sigurinë e nxënësve, pasi procesi ndodh në kohë kur objektet shkollore janë të mbushura me fëmijë.

Sipas vëzhguesve politikë, kjo lëvizje e shpejtë e Bulliqit tregon panik brenda kampit të tij elektoral, që duket se po kërkon të përfitojë nga çdo projekt publik për të ndikuar te votuesit në ditët e fundit para zgjedhjeve. Ironikisht, Vetëvendosje në Podujevë dikur kritikonte ashpër këto praktika, duke i quajtur “tentativa për blerje votash përmes projekteve”, ndërsa sot, sipas kundërshtarëve politikë, e ka tejkaluar modelin e kaluar.

Në reagimin e tij publik, Bulliqi tha:

“Sot vendosëm gurthemelin për ndërtimin e dy anekseve të reja shkollore… një investim i rëndësishëm në vlerë prej 1.2 milionë eurosh që do të krijojë kushte për zhvillimin e mësimit gjithëditor.”

Megjithatë, në këtë fazë të fushatës, qytetarët e Podujevës po e shohin këtë vrull të punimeve më shumë si pjesë të garës zgjedhore, sesa si përkushtim të sinqertë ndaj arsimit.