Isak Shabani reagon ndaj demantit të SHFMU “Shaban Shala”, publikon edhe pamje

Kandidati i PDK-së për kryetar të Podujevës, Isak Shabani, ka reaguar pas demantit të publikuar nga SHFMU “Shaban Shala”. Ai ka sqaruar se deklaratat e tij nuk kishin për qëllim të cenonin punën e stafit të shkollës, por të nxisnin vëmendjen për gjendjen e infrastrukturës shkollore në komunë.

“Nuk bëhet fjalë vetëm për ‘Shaban Shalën’, por edhe për shkolla të tjera në Llap – si ajo në Tërrnavë e shumë të tjera – ku gjendja e ambienteve, sidomos e tualeteve, është shqetësuese. Këto fakte i dëshmojnë vetë fotografitë që po i ndaj me ju”, ka theksuar Shabani.

Ai ka shtuar se prioritet duhet të jetë përmirësimi i kushteve për nxënësit dhe jo përplasjet publike.

“Fëmijët tanë meritojnë kushte dinjitoze për mësim, dhe kjo është përgjegjësi e institucioneve komunale. Prandaj, unë nuk do të ndalem së ngrituri zërin për këtë çështje deri sa çdo nxënës i Podujevës të ketë kushte më të mira për të mësuar”, ka deklaruar ai.

Ky është reagimi i Shkolles “Shaban Shala”:

DEMANT

Me indinjatë konstatojmë se kandidati i PDK-së për kryetar të Komunës së Podujevës, z. ISAK Shabani, ka shpërndarë të pavërteta duke deklaruar se ka vizituar SHFMU “Shaban Shala” dhe se gjoja gjendja në këtë shkollë është e mjerueshme.

Njoftojmë opinionin publik se:

Z. Shabani nuk ka vizituar shkollën tonë.

Gjendja në SHFMU “Shaban Shala” është e qartë për secilin që na viziton: shkolla ka përjetuar përmirësime të vazhdueshme në infrastrukturë, në kabinetet mësimore, në ambiente dhe në cilësinë e mësimdhënies.

Ky lloj manipulimi politik është i papranueshëm, veçanërisht kur bëhet fjalë për institucionin arsimor ku mësojnë fëmijët tanë.

Ftojmë qytetarët dhe prindërit të mos bien pre e deklaratave të pavërteta, por të vizitojnë vetë shkollën tonë dhe të shohin nga afër punën e bërë me përkushtim nga stafi dhe nxënësit.

SHFMU “Shaban Shala” do të vazhdojë të mbetet shembull i përkushtimit dhe përparimit në arsim, pavarësisht përpjekjeve për ta njollosur imazhin e saj.