Qytetarët e Podujevës besojnë në Mimoza Stublla-Abdullahun për një mandat tjetër të suksesshëm

Kandidatja e Partisë Demokratike të Kosovës (PDK), Mimoza Stublla-Abdullahu, ka hyrë përsëri në garën për Asamblenë Komunale të Podujevës, ku këtë herë figuron në listën zgjedhore me numrin 3.

Stublla-Abdullahu po merr mbështetje të konsiderueshme nga qytetarët e Podujevës, të cilët vlerësojnë punën e saj të deritanishme si asambliste, duke i dhënë besim që, siç thotë ajo, do të ua kthejë me angazhim dhe punë konkrete.

Zgjedhjet lokale në Republikën e Kosovës do të mbahen më 12 tetor, ndërsa kandidatja e PDK-së tashmë ka nisur takimet dhe komunikimin me qytetarët për të prezantuar vizionin e saj për një mandat të ri.

Kush është Mimoza Stublla-Abdullahu?

E lindur më 11 mars 1989 në Podujevë, Stublla-Abdullahu ka përfunduar studimet bachelor në drejtimin Psikologji dhe Studime Menaxheriale, ndërsa nivelin master në Administrim Biznesi dhe Menaxhment.

Ajo ka pasur një angazhim të gjatë në shoqërinë civile, ku u përfshi në projekte për të mirën e komunitetit, si dhe në monitorimin e strategjisë për kthimin dhe integrimin e komuniteteve. Për një periudhë ka qenë edhe eksperte e jashtme në Ministrinë e Administratës Publike.

Aktualisht, Stublla-Abdullahu është asistente administrative e çerdhes publike “Armela 2” në Podujevë, ku ka marrë vlerësime për aftësinë e saj në menaxhim dhe kujdesin ndaj fëmijëve.

Në vitin 2017, ajo u zgjodh asambliste në Asamblenë Komunale të Podujevës nga radhët e PDK-së, ku gjatë mandatit të saj u shqua për ngritjen e shqetësimeve dhe problemeve me të cilat përballen qytetarët e komunës.