Shqetësuese: Dy ish-ushtarë të UÇK-së humbin jetën brenda dy ditësh në Podujevë

Brenda vetëm dy ditësh, dy ish-ushtarë të Ushtrisë Çlirimtare të Kosovës kanë humbur jetën në rrethana të rënda në Podujevë, duke e thelluar edhe më shumë shqetësimin mbi gjendjen e kësaj kategorie që ka dhënë gjithçka për lirinë e vendit.

Ky fakt i rëndë po tregon një realitet të hidhur: shumë prej ish-ushtarëve po përballen me kriza të brendshme, shpesh edhe me gjendje të rënda psikologjike, që fatkeqësisht po çojnë deri në vetëvrasje.

Shoqëria kosovare, por mbi të gjitha institucionet e shtetit, duket se i kanë lënë pas dore ata që ishin shtylla e lirisë sonë. Ndërsa politika flet shpesh për meritat e luftës, në praktikë kujdesi për veteranët dhe ish-ushtarët mbetet minimal, shpesh i reduktuar vetëm në përfitime simbolike financiare.

Kjo ngjarje tragjike duhet të jetë kambanë alarmi për institucionet qendrore dhe komunale, të cilat duhet urgjentisht të krijojnë programe serioze mbështetëse për këtë kategori – qoftë në aspektin shëndetësor, psikologjik apo social.

Moskujdesi dhe heshtja institucionale rrezikojnë të thellojnë krizën edhe më shumë, duke e bërë shoqërinë tonë bashkëfajtore në këtë tragjedi që po përsëritet.

Është koha që shteti dhe shoqëria të mos i harrojnë ata që sakrifikuan gjithçka për lirinë tonë.