Lumi Llap pasqyra e mospërgjegjësisë, ndërsa pushteti lavdërohet me “investime në letër”

Gjendja e Lumit Llap në zemër të Podujevës po shndërrohet në një alarm të madh për shëndetin publik dhe mjedisin. Uji i ndotur, mbeturinat e shpërndara dhe era e rëndë që përhapet përgjatë brigjeve të tij po e kthejnë këtë arterie natyrore në një plagë të hapur të qytetit.

Ndërkohë, Shpejtim Bulliqi nuk heziton të dalë me deklarata për “investime të mëdha” në infrastrukturë e zhvillim, por shumica e tyre mbesin vetëm shifra në letra. Qytetarët, megjithatë, nuk mund t’i fshehin mushkëritë nga realiteti: ajri, uji dhe mjedisi i përditshëm që helmohen nga papastërtia e lënia pas dore.

Banorët shprehen të zhgënjyer, duke theksuar se Podujeva po shndërrohet në një vend ku lavdërimet politike për “suksese” nuk përputhen me pamjet që sheh syri e ndjen hunda. Lumi Llap, që dikur ishte krenari e qytetit, sot është dëshmi e dështimit për të menaxhuar më elementaren – ambientin ku jetojnë njerëzit.

“Investimet që i dëgjojmë në media janë vetëm fjalë, ndërsa ne po e thithim erën e ndotjes çdo ditë”, thotë një qytetar i Podujevës, duke shtuar se zëri i banorëve shpesh mbetet i padëgjuar.

Podujeva nuk ka nevojë për fjalë të mëdha, por për veprime konkrete. Lumi Llap meriton të rikthehet në jetën e qytetit, jo të mbetet simbol i papërgjegjësisë së pushtetit.