Ekrem Hyseni: Fundi i mashtrimeve është i pashmangshëm, qytetarët llapjan nuk durojnë më

Kandidati i Lidhjes Demokratike të Kosovës (LDK) për kryetar të Podujevës, dr. Ekrem Hyseni, sonte është pritur në familjen e kandidatit për Asamble, Naim Çunaku, ku është zhvilluar një takim me qytetarë dhe aktivistë të LDK-së.

Gjatë takimit, Hyseni ka prezantuar programin e tij qeverisës për katër vitet e ardhshme, duke theksuar se ai buron drejtpërdrejt nga kërkesat dhe nevojat reale të qytetarëve. Sipas tij, ky program është i orientuar në zgjidhjen e problemeve konkrete me të cilat ballafaqohen banorët e Podujevës, probleme që, siç tha ai, janë injoruar në vazhdimësi nga pushteti aktual.

“Fundi i mashtrimeve dhe mashtruesve është i pashmangshëm, sepse qytetarët llapjan nuk durojnë më,” deklaroi Hyseni, duke shtuar se vizioni i tij është një Podujevë më transparente, me menaxhim të drejtë të parasë publike dhe me investime që prekin drejtpërdrejt jetën e qytetarëve.