Komuna e Podujevës: Dallavere me konkurse, dallavere me tenderë

Në Komunën e Podujevës, e udhëhequr nga Shpejtim Bulliqi, po shtohen raportimet për keqpërdorime në të gjitha nivelet e qeverisjes lokale. Nga konkurset për punësim deri te tenderët publikë, gjetjet e institucioneve mbikëqyrëse dhe reagimet e shoqërisë civile po e nxjerrin në pah një situatë të rëndë të menaxhimit komunal.

Këshilli i Pavarur Mbikëqyrës për Shërbyesit Civil ka gjetur shkelje të shumta në konkurset e punësimit, duke konstatuar parregullësi serioze në proceset rekrutuese. Për pasojë, një numër i konsiderueshëm konkurseve është anuluar, duke ngritur dyshime të forta se punësimet janë orientuar drejt interesave të ngushta politike.

Situata nuk është më e mirë as te tenderët publikë. Sipas të dhënave, në shumicën e rasteve fitues dalin vetëm 4–5 kompani të njëjta, të cilat marrin projektet me çmime më të larta sesa konkurentët tjerë. Ky model, i përsëritur vazhdimisht, ka ngritur shqetësime serioze për korrupsion të organizuar dhe përjashtim të konkurrencës së ndershme.

Raportet e auditorit të jashtëm kanë evidentuar vazhdimisht parregullësi financiare në komunë, duke ngritur alarmin për mungesë të transparencës dhe shpenzime të dyshimta. Shoqëria civile dhe mediat vendore kanë publikuar me dhjetëra raste që ngjallin dyshime për keqpërdorime milionëshe në Podujevë, ndërsa sinjalizuesit kanë dhënë dëshmi të drejtpërdrejta për praktikat e dyshimta brenda administratës.

Prokuroria e Shtetit ka konfirmuar se shumë raste që lidhen me Komunën e Podujevës janë nën hetim aktiv. Burime brenda organit të akuzës kanë bërë të ditur se dhjetëra zyrtarë komunalë tashmë janë intervistuar nga hetuesit policorë, ndërsa proceset po vazhdojnë.

Përderisa raportet, hetimet dhe reagimet po shtohen, Komuna e Podujevës ende nuk ka dhënë përgjigje të qarta për këto akuza serioze. Sipas analistëve lokalë, situata aktuale e vendos qeverisjen komunale të Shpejtim Bulliqit në një krizë të thellë besueshmërie, duke dëmtuar rëndë imazhin e institucioneve publike para qytetarëve.