56% e qytetarëve thonë se Kosova po ecën keq 

Sipas sondazhit të IRI-së, shumica e qytetarëve të Kosovës mendojnë se vendi po ecën në drejtimin e gabuar.

56 për qind e qytetarëve të Kosovës po mendojnë që vendi po shkon në drejtim të gabuar, kanë treguar matjet që i ka realizuar Instituti Ndërkombëtar Republikan (IRI).

Në këtë pikë, Kosova ka rënie të konsiderueshme në krahasim me vitin e kaluar, ku 65 për qind e qytetarëve mendonin se vendi është në drejtim të duhur.

Sipas këtij sondazhi, që është realizuar në periudhën kohore maj-korrik 2025, qytetarët e Kosovës i kanë renditur kostoja e jetës/çmimet e larta, papunësinë dhe korrupsionin si problemet më të mëdha në vend.

45 për qind e qytetarëve të Kosovës e kanë konsideruar koston e jetës/çmimet e larta si problemin kryesor. 19 për qind e tyre kanë thënë papunësinë dhe 6 për qind korrupsionin.

Përveç këtyre, si probleme tjera, qytetarët e Kosovës e kanë konsideruar situatën e përgjithshme politike. 5 për qind e tyre e kanë përmendur këtë problem. 3 për qind emigrimin, 3 për qind ekonominë në kuptimin më të gjerë dhe po 3 për qind kujdesin shëndetësor.

Ky sondazh në Kosovë u realizua me një kampion përfaqësues prej 1 mijë e 164 të rriturish. Marzhi i gabimit është plus minus 3.3 për qind. Janë zhvilluar edhe intervista ballë për ballë në ekonomi familjare.