Agim Veliu thotë se nuk e kupton pse Bulliqi e mohon të kaluarën e tij në LDK

Ish-kryetari i Komunës së Podujevës, Agim Veliu, ka komentuar zhvillimet politike në këtë komunë, duke theksuar rolin e tij vendimtar ndër vite dhe duke kritikuar qëndrimin e kundërshtarit të tij politik, Shpejtim Bulliqi.

Në një intervistë për emisionin “Adresa”, Veliu tha se për vite të tëra ka qenë një faktor përcaktues në zgjedhjet lokale dhe se nuk ka humbur asnjë garë ku ka marrë pjesë.

“U pa që unë kam qenë faktor në Podujevë me vite të tëra, sepse nuk e kam humbë asnjë garë në asnjë palë zgjedhje. Sa herë kam dalë për çfarëdo pozicioni, unë kam dalë fitues,” u shpreh ai.

Veliu po ashtu u ndal te e kaluara politike e Bulliqit, duke thënë se nuk e kupton arsyen pse ai mohon lidhjet e tij me LDK-në. Sipas tij, LDK ka qenë ajo që e ka mbështetur Bulliqin me pozita të rëndësishme gjatë karrierës së tij.

“Unë nuk e kuptoj pse Bulliqi mohon të kaluarën e tij në LDK, sepse kjo parti i ka dhënë shumë hapësirë dhe pozita,” shtoi Veliu.

Sipas ish-kryetarit, kjo qasje tregon një mospërfillje ndaj kontributit që LDK ka dhënë në formimin politik të Bulliqit.