Tre raporte radhazi me “Opinion të Kualifikuar”: Bulliqi kritikohet për dështime në menaxhimin e Komunës së Podujevës

Zyra Kombëtare e Auditimit (ZKA) ka publikuar raportin më të fundit për Komunën e Podujevës, ku edhe këtë vit ka dhënë Opinion të Kualifikuar. Ky është raporti i tretë me radhë ku Komuna, nën udhëheqjen e Shpejtim Bulliqit, del me të njëjtat probleme dhe pa masa konkrete për t’i adresuar ato.

Sipas raportit, Komuna ka kontraktuar projekte pa pasur mbulim financiar, duke shkelur drejtpërdrejt ligjin e prokurimit publik. Po ashtu, tenderët janë dhënë për kompani që nuk kanë plotësuar kriteret e kërkuara, ndërsa mbi 2 milionë euro janë shpenzuar për shlyerjen e detyrimeve nga kontratat kolektive, ndonëse ato mjete ishin të destinuara për kategori të tjera buxhetore.

Auditimi ka evidentuar edhe keqklasifikime prej mbi 2.1 milionë eurosh, gabime në raportimin e pasurive kapitale dhe jo-kapitale, mungesë transparence në kontratat për shfrytëzimin e pronave komunale dhe vonesa të shumta në pagesa.

Fakti që këto gjetje përsëriten vit pas viti, tregon se udhëheqja e Bulliqit nuk po merr masa seriozepër të përmirësuar gjendjen financiare dhe ligjore në Komunë. Moszbatimi i rekomandimeve të ZKA-së ka bërë që besueshmëria e pasqyrave financiare të Podujevës të vihet në pikëpyetje dhe qytetarët të humbin besimin në menaxhimin e fondeve publike.

Ekspertë të financave thonë se vazhdimi i kësaj praktike e rrit rrezikun për keqpërdorim të buxhetit dhe sjell pasoja direkte në zhvillimin e projekteve kapitale që prekin jetën e qytetarëve.