Vazhdon debati: Reagime të shumta pro Dr. Ekrem Hysenit pas akuzave të Bulliqit

Debati mes kandidatëve për kryetar të Podujevës ka nxitur reagime të shumta, sidomos pas deklaratës së Shpejtim Bulliqit nga Lëvizja Vetëvendosje, i cili e akuzoi kundërkandidatin e tij, Dr. Ekrem Hysenin, se nuk kujdeset për pacientët dhe madje nuk u përgjigjet as në telefon atyre me sëmundje kronike.

Bulliqi gjatë debatit në RTV21 tha se ka pranuar ankesa nga qytetarë dhe pacientë për qasjen e Hysenit.

“Kundër kandidati jem është mjek, me telefon duhet me qenë human, ky as telefonin nuk ia hap pacientëve të vetë dhe pacientët me sëmundje kronike ngajnë mas tij. Kam shumë ankesa ndaj tij”, tha Bulliqi.

Në anën tjetër, Dr. Ekrem Hyseni mohoi kategorikisht këto akuza, duke i quajtur ato propagandë.

“Kam shumë për nder se asnjë festë nuk kam bërë pa iu përgjigj pacientëve. Kjo është pjesë e propagandës tanë”, tha Hyseni.

Pas këtij debati kanë ardhur një varg reagimesh nga pacientë të tij që e mbrojnë doktorin dhe punën e tij shumëvjeçare. I fundit që ka reaguar është ish-komandanti i UÇK-së në Zonën e Llapit, veprimtari Kadri Avdiu, i cili së fundmi është operuar nga një tumor.

“Unë, bashkë me bashkëshorten time, jemi pacientë të Dr. Ekrem Hysenit dhe mund të dëshmoj me ndërgjegje të plotë se ai kurrë nuk ka marrë asnjë cent nga ne. Shërbimi i tij ka qenë gjithmonë profesional dhe human”, tha Avdiu.

Reagime të ngjashme pritet të vazhdojnë edhe në ditët në vijim, pasi ky debat ka nxitur një diskutim të gjerë në opinionin llapjan mbi rolin e mjekut në shoqëri dhe etikën profesionale.