Isak Shabani reagon për gjendjen e shkollave në Podujevë: “Nxënësit po mësojnë në kantier ndërtimi”

Kandidati për kryetar të Komunës së Podujevës nga Partia Demokratike e Kosovës (PDK), Isak Shabani, ka reaguar ashpër ndaj gjendjes në të cilën ndodhen disa shkolla, ku sipas tij, procesi mësimor po zhvillohet mes pluhurit dhe zhurmës së punimeve.

“A është kjo shkollë apo kantier ndërtimi? Si mundet që fëmijët tanë të detyrohen të mësojnë nën zhurmën e çekanave dhe mes pluhurit të punimeve? Kush e quan këtë arsim normal?”, ka shkruar Shabani.

Ai theksoi se meremetimet dhe renovimet duhet të kryhen gjatë pushimeve verore, e jo në kohën kur nxënësit kanë filluar mësimin, duke e cilësuar këtë si shembull tipik të “keqplanifikimit dhe moskujdesit institucional”.

“Arsimi nuk duron arna dhe improvizime nxënësit meritojnë kushte dinjitetshme, jo mësim në kantier!”, ka shtuar kandidati i PDK-së, duke pyetur se kush do të mbajë përgjegjësi për këtë situatë dhe për sigurinë e fëmijëve.

Shabani e ka mbyllur reagimin e tij me moton zgjedhore të partisë: “#PDK191  #Ma Mirë Për Podujevën”.