Artistët llapjanë mes politikës: kush po rreshtohet në krah të partive në Podujevë?

Fushata elektorale në Podujevë nuk po zhvillohet vetëm nga politikanët. Në skenën politike lokale po shihen gjithnjë e më shumë edhe fytyra të njohura të artit, të cilët po deklarojnë hapur përkrahjen e tyre për parti dhe kandidatë të ndryshëm.

Në postimin e fundit të kandidatit të LDK-së, Ekrem Hyseni, teksa prezantonte një kandidate për asamblenë komunale, në fotografi u pa edhe këngëtarja dhe aktorja e njohur Ryva Kajtazi. Ky paraqitje lë të kuptohet se Ryva i është bashkuar hapur mbështetjes për LDK-në në Podujevë.

Nga ana tjetër, aktori dhe humoristi i njohur Adnan Blaku i cili njihet për rolin e tij si “Sofia” ka publikuar një postim në përkrahje të iniciativës “Unioni i Blakçorëve”. Duke qenë se vetë vjen nga familja Blakçori, Blaku ka zgjedhur të përkrahin këtë nismë që garon vetëm për asamble dhe jo për postin e kryetarit.

Ndërkaq, një tjetër aktor i njohur llapjan, Gani Podvorica, është shfaqur në krah të kandidatit të Vetëvendosjes, Shpejtim Bulliqi, duke i dhënë atij mbështetjen publike.

Mbetet të shihet më 12 tetor, kur mbahen zgjedhjet lokale në Podujevë, nëse përkrahja e këtyre artistëve do të ndikojë në rritjen e votave për kandidatët që ata mbështesin, apo nëse ky angazhim politik do t’u kushtojë atyre me humbje të fansave.