Policia kërkon ndihmën e qytetarëve për kapjen e të dyshuarit për vrasjen në Llapashticë të Epërme të Podujevës

Policia e Kosovës (PK) përmes publikimit të fotografisë ka kërkuar bashkëpunimin e qytetarëve dhe medieve për arrestimin e të dyshuarit Arbër Havolli, i cili dyshohet për vrasjen që ndodhi më 6 shtator në Llapashticë të Podujevës.

I dyshuari gjendet në arrati nga 6 shtatori, raporton “Betimi për Drejtësi“.

“Njësiti i hetimeve të përgjitshme që operon në kuadër të Drejtorisë Rajonale të Policisë në Prishtinë, me autorizim nga prokuroria kompetente, kërkon ndihmë nga qytetarët në ofrimin e informatave, të cilat do të ndihmonin në arrestimin e personit të dyshuar për veprën vrasje që ka ndodhë me datën 06.09.2025 në fshatin Llapashticë e epërme -Podujevë. Personi i dyshuar ARBER HAVOLLI ndodhet në arrati, andaj për çdo informatë që mund të çojë në identifikimin e vendodhjes së tij, na kontaktoni direkt në: E-mail: info@kosovopolice.com , Android #app: Lajmero Policine, Tel: 192″, thuhet në njoftim.

Prokuroria ka bërë të ditur se motivet dhe rrethanat e ngjarjes ende nuk dihen.

“Ju njoftojmë, për rastin e ndodhur se prokurori i shtetit në koordinim me policinë kanë dalur menjeherë në vendin e ngjarjes dhe janë ndërmarrë të gjitha veprimet hetimore. Trupi i viktimës B.S., është dërguar për në obduksion, ndërsa motivet dhe rrethanat e ngjarjes janë ende duke u hetuar. Personi i dyshuar i cili ka kryer vepren penale ‘’Vrasje” bazuar nga neni 172 te Kodit Penal të Republikës së Kosovës A.H., gjendet në arrati dhe po kerkohet nga organet e rendit”, ka njoftuar Prokuroria.

Sipas Policisë, viktima është gjetur të shtunën rreth orës 19:30.

“Sot rreth orës 19:30, kemi marrë informatën për të shtëna me armë në fshatin Llapashticë të Podujevës. Menjëherë në vendin e ngjarjes kanë dalë njësitet e nevojshme policore, ku kanë hasë në një person pa shenja jete. Vdekjen e viktimës mashkull e ka konstatuar ekipi mjekësor në vendngjarje”, ka njoftuar Policia.